Read Bibliya Yera 1951 Yobu 21 Bible Online

Yobu 21 - Bibliya Yera 1951 bible

Yobu 21

¹Maze Yobu arishura,

²ati Ni mwitwaririke kwumva ivyo mvuga; Uko ni ko mwommara umubabaro.

³Ni munyihanganire, mvuge nanje, Maze ni naheza kuvuga mukomeze mutwenge.

⁴Mbeg’ abantu ni bo nganyira? Icotuma nihangana n’iki?

⁵Ni munyitegereze mwumirwe, Mwifate ku munwa.

⁶Iyo mvyibutse ngira ubgoba, Umubiri wanje ugafatwa n’ agatengo.

⁷N’iki gituma abanyakibi babaho, Bakīsāzira, mbere bakarushiriza kugira inkomezi?

⁸Uruvyaro rwabo rwāruka barubona, Abana babo bārukira imbere y’amaso yabo.

⁹Ingo zabo zībēra amahoro ata co zīkanga, Kand’ inkoni y’Imana ntibagerako.

¹⁰Impfizi zabo nta ho zihangūra kuvyara; Inka zabo zama zivyara, ntiziramburure.

¹¹Ibibondo vyabo birōngōra imbere yabo nk’umukuku, Kand’ abana babo bama bavyina.

¹²Baririmbisha udushako tw’ ingoma n’inanga, Bakanezererwa ijwi ry’umwironge.

¹³Imisi yabo bayimara baroraniwe, Maze bakamanuka i kuzimu banihutse.

¹⁴Yamar’ ari bo bābariye Imana, bati Tuve i ruhande, Kuko tutagomba kumenya inzira zawe.

¹⁵Bat’ Īshobora vyose n’iki, ngo tuyisabe? Kandi ni twayisenga, bizotumarira iki?

¹⁶Rāba, umugisha wabo si bo bawizigamiye: Inama y’abanyakibi iba kure yanje.

¹⁷Mbega har’ aho mubona itara ry’abanyakibi rizima, Ivyago bikabatera, Imana ikabagabanganya imibabaro iri n’uburake,

¹⁸Bakaba nk’ibishingwe bitwarwa n’umuyaga, Nk’umuguruka utumurwa n’ igihuhuta?

¹⁹Mbeg’ Imana izohanira abana ibigabitanyo vya se? Eka ni yihanirwe ubgiwe, yibonereko!

²⁰Ayiwe maso ni yibonere ivyago vyiwe, Kand’ anywe ku burake bg’ Īshobora vyose!

²¹Ibizoba ku b’inzu yiwe bazomukurikira mbeg’ azobibabara, Kand’ apfuye akenyutse?

²²Har’ uwokwigisha Imana ubgenge, Kand’ ari yo icira imanza abahambaye?

²³Umwe apfa, agifise inkomezi zishitse, Acidibamiye mu mahoro,

²⁴Ivyansi vyiwe bicuzuye amata, Umusokōro ukiyagagira mu magufa yiwe.

²⁵Uwundi apfana intimba mu mutima, Atigeze kubona ivyiza.

²⁶Bompi baryamana mu mukungugu, Inyo zikaborosa.

²⁷Erega ndazi ivyiyumviro vyanyu, N’imigabo mibi mungīra.

²⁸Kuko muvuga, mut’ Inzu y’ ūhambaye iri hehe? N’urugo abanyavyaha bāhoramwo ruri hehe?

²⁹Mbega ntimuraruha mubaza abantu b’ingenzi? Ntimwemeye ivyo bashingiye intahe,

³⁰Yukw inkozi y’ikibi ihora irokoka ku musi w’ivyago, Kandi kw ikira ku musi w’ uburake?

³¹Ni nde yomwereka ingeso ziwe imbonankubone? Ni nde yomusubiriza mu nkōko ivyo yakoze?

³²Yamar’ azoterurirwa mu cobo, Bazorinda imva yiwe.

³³Ibisinde vyo mu mwonga bizomworohera, Abantu bose bazomukurikira, Kand’ abāmwitangiye imbere babaye isinzi.

³⁴None rero n’iki gituma munyirurisha ivy’ ubusa? Ibisigaye mu vyo munyishura n’ibinyoma bisa!