Read Bibliya Yera 1951 Yobu 23 Bible Online

Yobu 23 - Bibliya Yera 1951 bible

Yobu 23

¹Maze Yobu arishura,

²ati No gushitsa uyu musi amajojwa yanje aharūrwa nk’umugararizo: Uko nkubitwa kuruta uko nniha.

³Iyo mba nari nzi aho noyibona, Kugira ngo nduhe nshike n’ imbere y’intebe yayo!

⁴Noyikūrira ku ntango urubanza rwanje, Akanwa kanje nkakuzuzamw’ amajambo y’imibūrano.

⁵Nkamenya amajambo yonyishura, Ngatahura ico yombarira.

⁶Mbega yontwarisha ituntu ubushobozi bgayo buhambaye? Oyaye, arikw ivyanje yobishira ku mutima.

⁷Aho ni ho umugororotsi yobūranira na yo, Īncira urubanza ikancira urutazokwivuguruzwa gushitsa ibihe bidashira.

⁸Rāba, nja imbere, ariko si ho iri; Nasubira inyuma, nkayibura;

⁹Naja i bubamfu mu gihe ikorera, na ho nyene sinshobore kuyibona; Yihisha ku ruhande rw’i buryo, kugira ngo sindayikubite ijisho.

¹⁰Yamara yo irazi inzira ncamwo; Ni yamara kumvugutira nzovamwo mmeze nk’izahabu.

¹¹Ikirenge canje nacometse mu cayo; Inzira yayo narayikomeje, sinakikama.

¹²Nta ho nasubiye inyuma ngo mve mu vyagezwe yashinze; Nashize umutima ku majambo yo mu kanwa kayo kuruta uko ndawushira ku vyo kurya bintunga.

¹³Yagiye imigabo: none ni nde yoshobora kuyibuza? Kand’ ico umutima wayo ugomvye ni co ikora.

¹⁴Kukw ari yo izonshitsakw ivyo yangereye: Kand’ ifise ibindi vyinshi bimeze nk’ivyo.

¹⁵Ni co gituma ndandurwa umutima no kuba imbere yayo; Iyo ndayiyumviriye ndayitinya.

¹⁶Kukw Imana ari yo idendebuye umutima wanje, Kand’ Īshobora vyose ikaba ari yo inciye ivutu.

¹⁷Ivyo ni vyo binshābije, s’ umwiza, S’uk’ umwiza w’umuzitanya untwikiriye mu maso.