Read Bibliya Yera 1951 Yobu 24 Bible Online

Yobu 24 - Bibliya Yera 1951 bible

Yobu 24

¹N’iki gituma Īshobora vyose idashinga ibihe vy’imanza? N’iki gituma abayizi batabona iyo misi?

²Har’ abashingūra akarimbi k’ urubibe, Bakanyaga imikuku ku manyama bakayīragirira.

³Bakinagiza akadogoba k’ impfuvyi, Batwara agaka k’umupfakazi kw ingwati.

⁴Bashiburira abagorwa hirya y’inzira: Impahazwa zo mu gihugu zikanyegagira hamwe.

⁵Ehe basokororwa no gukora, banuranura utwo kurya, Bameze nk’indogoba z’inyeshamba zo mu bugaragwa: Mu bugaragwa honyene ni ho bakūrira abana utwo kurya.

⁶Basigaye batungwa no kwahira ibibabi mu matongo, Bapfa guhumba uducekwa two mu mizabibu y’abanyakibi.

⁷Ijoro ryose barāra ubutura, ata co bipfutse, Kandi mu mbeho nta co bishirako.

⁸Bacikirwako n’imvura imanutse ku misozi, Bikinga mu gitandara babuze ubgugamo.

⁹Har’ abashikura impfuvyi ibere, Bakāka ingwati aboro,

¹⁰Bigatuma bagenda gusa, ata co bambaye, Kandi baremēkwa ibinyankinda n’inzara mu nda;

¹¹Bagakānyūra amavuta muri elayo mu ngo z’abo banyakibi, Bagakānyana inyota mu māto yabo.

¹²Mu gisagara abantu baraniha, Kand’ imitima y’abakomeretse iratakamba: Yamar’ Imana ntiruha ivyibaza.

¹³Abo n’abo mu bagarariza umuco, Ntibazi inzira zawo, Canke ngo bazigumemwo.

¹⁴Umwicanyi azinduka mu gahuru, akica impahazwa n’ umukene; No mw ijoro amera nk’igisuma.

¹⁵Ijisho ry’umusambanyi ritega akagoroba, Akavuga, ati Nta wuribunkubite ijisho: Akipfuka mu maso.

¹⁶Mu mwiza bimba amazu: Ku murango bakīrirwa biyugaranye; Ntibazi umuco.

¹⁷Bose agatondo‐tondo kabamerera nk’igitūtu c’urupfu, Kuko bamenyereye ubgoba buterwa na co.

¹⁸Bahehwa vuba n’amazi; Umugabane wabo uravumwe mu gihugu: Ntibakijana inzira ija mu ruzabibu.

¹⁹Ikigatwa n’ubushuhe bikamura amazi ya shelegi;[5] Ni ko n’i kuzimu hakamanganya abakoze ivyaha.

²⁰Inda yamuvyaye izomwibagira; inyo zizomurya ziryoherwe; Ntazokwongera kwibukwa ukundi: Ukugabitanya kuzovunwa nk’ igiti.

²¹Arya umugore w’ingumba atigeze akana, Kandi nta ho agirira neza umupfakazi.

²²Imana yongera abanyenkomezi kuramba kubg’ ubushobozi bgayo, Bagasubira kuzunzuka bāri bihebuye.

²³Ibaha kuba amahoro, bakayadibamamwo; Kand’ inyonga zayo izihanze ku nzira zabo.

²⁴Bashirwa hejuru: maze hāshira igihe gito bakaba bīgīriye; Mbere bacishwa bugufi, bagakūrwa mu nzira nk’abandi bose, Bakagenywa nk’uburo.

²⁵N’ubu namb’ atari ko biri, ni nde yompinyuza ko nd’ umubeshi, Agahindura ubusa amajambo yanje?