Read Bibliya Yera 1951 Yobu 27 Bible Online

Yobu 27 - Bibliya Yera 1951 bible

Yobu 27

¹Maze Yobu yongera kuvuga amajambo yiwe y’ibirāgurāgu,

²ati Ndahiye uguhoraho kw’ Imana, ari yo yandīririye urubanza, Ni yo Īshobora vyose, yagiriye nabi ubugingo bganje,

³Ubugingo bganje bukidundega, Impwemu z’Imana zikiri mu mazuru yanje,

⁴N’ukuri iminwa yanje ntizovuga ivy’ ukugabitanya, Cank’ ururimi rwanje ngo ruvuge ivy’ ubugunge.

⁵Ntibikabeho yuko nobemerera ngo muvuze ibiroranye; Kugeza aho nzopfira, sinzokwigera mva ku gutungana kwanje.

⁶Ukugororoka kwanje ndakubangirije, nta ho nzokurekura, Umutima wanje ntuzokwigera unyagiriza no ku vy’umusi n’umwe mu yanje yose.

⁷Umwansi wanje n’amere nk’ umunyakibi, Kand’ ūnkūriye hasi n’amere nk’umugabitanyi.

⁸None se ūtubaha Imana agira ivyizigiro ki, Iy’ Imana imuciye, ikamwaka ubugingo bgiwe?

⁹Mbeg’ Imana yokwumva ugutakamba kwiwe, Ivyago iyo bimuteye?

¹⁰Canke se yohimbarwa n’ Īshobora vyose, Akāma atabaza Imana ibihe vyose?

¹¹Reka ndabigishe ivy’ ububasha bg’Imana; Imigabo y’Īshobora vyose sinoyihisha.

¹²Rāba mwebge mwese ubganyu mwaravyiboneye; None se n’iki gitumye muba abatagira ico bamaze na mba?

¹³Eh’ uyu ni wo mugabane umunyakibi aronka ku Mana, Ni yo ngero y’abahahaza, iyo bagererwa n’Īshobora vyose.

¹⁴Abana biwe ni bagwira, bazogwirira inkota; N’uruvyaro rwiwe ntibazoronka ivyo kurya bibahāza.

¹⁵Amasigarira yo mu biwe azomirwa n’urupfu, Kand’ abapfakazi babo ntibazobaririra.

¹⁶Naho yotekeranya amafeza nk’ umukungugu, Akirundaniriza imyambaro nk’ibumba;

¹⁷Ashobora kuyirundanya, arik’ umugororotsi ni we azoyambara; Na ya mafeza, abatācumuye ni bo bazoyagabangana.

¹⁸Yiyubakiye inzu nk’iy’ igitangurirwa, Nk’umutara wubatswe n’ umurinzi w’inyoni.

¹⁹Yiryamira ar’ umutunzi, bigaciraho; Agize ngw arakanura, agasanga atakiriho.

²⁰Ibiteye ubgoba bimwisukako nk’isūri, Ikirura kimuhitana mw ijoro.

²¹Umuyaga uturutse i burasirazuba uramutwara, akagīrako; Uramukubeba akava aho yahora.

²²Mber’ Imana izomurasa ntimuzigurize, Azokwifuza guhunga ngw ave mu maboko yayo.

²³Abantu bazomwitamba ku muvyimba bakubite amashi ku yandi, Bazomwimyoza arikw arava i we.