Read Bibliya Yera 1951 Yobu 28 Bible Online

Yobu 28 - Bibliya Yera 1951 bible

Yobu 28

¹N’ukuri har’ inganzo yimbgamw’ ifeza, N’ahantu bakūra izahabu ngo bazivugutire.

²Ubutare bukūrwa mw ivu, N’ibuye barivugutira ngo rivemw’ imiringa.

³Abantu badōbēra mu mwiza bakawurangiza, Bagashika kw iherezo ry’ urubibe rwawo Basesangura amabuye yo mu mwiza w’umuzitanya no mu gitūtu c’urupfu.

⁴Bimba urwobo rugera kure y’aho abantu baba; Ingenzi zihahita nta co zībaza kuri bo; Bacundeba muri rwo kure y’abantu, bakenena hirya no hino.

⁵Isi ivamw’ ivyo kurya; Arikw i kuzimu muri yo hazīkururwa nk’aho hazīkuruwe n’umuriro.

⁶Mu mabuye yaho harih’ ahantu h’utubuyenge twitwa safiro, Hakaba n’ifu y’izahabu.

⁷Iyo nzira nta gisiga c’amero kiyizi, N’ijisho ry’ikinyakabaka ntiryigeze kuyibona:

⁸N’ibikōko vyihayagiza nta ho vyayikandagiyemwo, Cank’ intambge y’inkazi ngw iyihitemwo.

⁹Baramvura amaboko yabo ku kibuye c’isare; Bubika imisozi bahereye mu mizi yayo.

¹⁰Basatagura inzira mu bibuye; Amaso yabo yitegereza ikintu cose c’igiciro kinini.

¹¹Bagomera imigezi ntidonye; Kandi n’icari gihishijwe bakizana ahabona.

¹²Arik’ ubgenge bgo, buzoboneka hehe? Cank’ ahantu ugutahura kuba ni hehe?

¹³Abantu ntibazi igiciro cabgo, Ntibuboneka mw isi y’abariho.

¹⁴I bgina haravuga, hati Ntiburi muri jewe; N’ikiyaga kiravuga, kiti Ntibur’ aho ndi.

¹⁵Ntiburonkeshwa amazahabu, Kandi n’amafeza ntagerwa ku munzane ngw abe igiciro kibuguze.

¹⁶N’amazahabu yavuye muri Ofiru nta ho yohūza uburiba na bgo, Cank’ utubuyenge twitwa shohamu tw’igiciro kinini, haba n’utwitwa safiro.

¹⁷Izahabu n’ibirahuri nta ho vyoshobora kugereranywa na bgo; N’ivyacuzwe mw izahabu nziza ntivyobukāba.

¹⁸Ivyitwa fezaruka n’ibirahuri ntivyoruha binavugwa, Mber’ igiciro c’ubgenge kirengeye utubuyenge twitwa marijani.

¹⁹Ivyitwa pitida vyavuye muri Etiyopiya nta ho vyogereranywa na bgo, Kand’ izahabu iramuye nta ho yohūza uburiba na bgo.

²⁰None rer’ ubgenge bganduruka he? Kand’ ahantu ugutahura kuba ni hehe?

²¹Ko buhishijwe amaso y’abariho bose, Bukanyegezwa ibiguruka mu kirēre.

²²Amahonero n’urupfu biravuga, Biti Twumvise impuha zabgo ku matwi gusa.

²³Imana ni yo izi inzira yabgo, Ni yo izi ahantu buba.

²⁴Kuko yitegereza gushitsa ku mpera z’isi, Ikarāba n’ibiri musi y’ijuru vyose.

²⁵Hamwe yagera uburemerezi bg’umuyaga, Ikagera amazi mu rugero,

²⁶Hamwe yashingira imvura icagezwe, N’umuravyo w’inkuba ikawugerera inzira;

²⁷Ni ho yabgitegerereje, irabuserura; Irabushinga, mber’ irabusuzuma.

²⁸Maz’ ibgira abantu, Iti Rāba kwubaha Uhoraho ni bgo bgenge, Kandi kuva mu vyaha ni kwo gutahura.