Read Bibliya Yera 1951 Yobu 29 Bible Online

Yobu 29 - Bibliya Yera 1951 bible

Yobu 29

¹Maze Yobu yongera kuvuga amajambo yiwe y’ibirāgurāgu,

²at’ Icompa nkaba nari mmeze nk’uko nari ndi mu mezi yahise, Nko mu misi Imana yanzigamiramwo;

³Igihe itara ryayo ryākira hejuru y’umutwe wanje, Umuco wayo ukancisha mu mwiza;

⁴Nkaba nk’uko nari mmeze igihe nari nshitse ubukombe, Hamwe inama y’Imana yar’ ikiri mu rugo rwanje;

⁵Igihe Īshobora vyose yar’ ikiri kumwe nanje, Abana banje bakinkikije;

⁶Ibirenge vyanje bigitonyanga ivuta, Ubgato bgimbge mu gitandara bukinsendanishiriza amavuta ya elayo!

⁷Uko nasohoka, nkaja kw irembo ry’igisagara, Ngaterekesha intebe yanje ahiyaguye,

⁸Imisore yarambona, ikihisha, Abahūmure na bo bakampagurukira bagahagarara;

⁹Abaganwa bagacereza, Bakifata ku munwa.

¹⁰Ijwi ry’abapfasoni ryarahora, Ururimi rwabo rukamatana n’uruhekenyero.

¹¹Uk’ugutwi kwanyumva kwarampezagira, N’ijisho uko ryambona ryambera igishingantahe:

¹²Kuko narokora impahazwa itakamba, Kandi n’impfuvyi itagira gitabara.

¹³Umugorwa yarampezagira, Kandi nanezereza umutima w’umupfakazi.

¹⁴Nambara ukugororoka, kukansagira, Kuroranya kwanje kwari kumbereye nk’umutamana n’ igitsibo.

¹⁵Nar’ amaso y’impumyi, Nar’ ibirenge vy’ūcumbagira.

¹⁶Nari se w’abakene, Natondanuza urubanza rw’ uwo ntazi.

¹⁷Navunagura imibangabanga y’ umugabitanyi, Nkamushikura iminyago mu menyo yiwe.

¹⁸Maze naravuga, nti Nzopfira mu rugo rwanje, Nti Nzogwiza imisi yanje ingane n’umusenyi:

¹⁹Nt’ Imizi yanje ishōreye mu mazi, N’ikime gitonda kw ishami ryanje bukarinda buca:

²⁰Nt’ Ubgiza bganje bgama bgiyubura, N’umuheto wanje uhora ar’ umwerasi mu ntoke zanje.

²¹Abantu bāhora bantega amatwi, bakitega ico mvuga, Bagacereza, ngo bumve inama yanje.

²²Iyo mmaze kuvuga, nta wagira ico asubiza; Amajambo yanje yabatonyangako.

²³Kandi bānyitega nk’abiteze imvura, Bakāsama cane, nk’abāsamira imvura y’urushana.

²⁴Narabatwenza bihebuye, Kand’ umukēra wo mu maso hanje ntibāwuhindura ngo hijirwe.

²⁵Nakunda inzira ija aho bari, nkicara nk’umutware, Naba nk’umwami mu ngabo ziwe, Nkaba nk’ūhoza abagandaye.