Read Bibliya Yera 1951 Yobu 31 Bible Online

Yobu 31 - Bibliya Yera 1951 bible

Yobu 31

¹Nasezeranye isezerano n’ amaso yanje; None noshobora nte gushira ijisho ku mwigeme?

²Kuk’ umugabane Imana yompa uvuye mw ijuru woba iki? N’inyegu ivuye iyo hejuru Īshobora vyose yompa yoba inki?

³Mbega ntiyoba ubugesera bubīkirwa umugabitanyi, N’ivyago bibīkirwa inkozi z’ ibibi?

⁴Mbega yo yo ntiyitegereza inzira zanje, Igaharūra intambuko zanje zose?

⁵Asangwa naragendeye mu binyoma, Ikirenge canje kikihutishwa no kuja kugunga,

⁶Ni ngerwe ku munzane w’ ukuri, Kugira ngw Imana imenye ukugororoka kwanje!

⁷Asangw’ ibirenge vyanje vyarakebeje mu nzira, Umutima wanje ugakurikira amaso yanje, Kand’ asangwa har’ agasembga na kamwe kometse ku biganza vyanje:

⁸Ndakarima, birye uwundi, Mbere n’imirima yo mu ndimiro yanje irandurwe!

⁹Asangw’ umutima wanje warasutswe n’umugore, Nkabunda ku muryango w’ umubanyi wanje:

¹⁰Umugore wanje aragasēra uwundi, Kand’ akindweko n’abandi.

¹¹Kukw ico coba ar’ ishano ritavugwa, Mbere coba ar’ ikibi co guhanirwa mu bacamanza;

¹²Coba ar’ umuriro utongora gushitsa uhoneje, Ugaturira imirima yanje yose.

¹³Asangwa narīrengagije ivy’ umushumba wanje cank’ ivy’ incoreke yanje, Igihe banyitwarako:

¹⁴None nzobikika nte, igihe Imana izokwisidukira? Noyishura iki, igihe ije kumbazaguza?

¹⁵Mbeg’ iyandemeye mu nda ya mama si yo yamuremye na we? Iyatubumbiye mu nda s’ imwe?

¹⁶Asangwa narīmye abagorwa ico bifuza, Canke naratumye amaso y’ abapfakazi akoboka;

¹⁷Cank’ asangwa narigunganye ivyo kurya vyanje, Impfuvyi ntibikoreko,

¹⁸Kand’ uhereye mu buto bganje ari jewe nayireze ndi nka se, N’umupfakazi ari jewe namuhagarikiye, nkiva mu nda ya mama;

¹⁹Kand’ asangwa har’ uwo nabonye yishwe no kubura ico yambara, Cank’ umukene abuze ico yipfuka,

²⁰Asangw’ urukenyerero rwiwe rutampezagiye, Kand’ atāsusurukijwe n’ubgoya bg’intama zanje;

²¹Kand’ asangwa narabanguriye ukuboko impfuvyi, Kubgo kugira aho mpininikiye mu rukinja;

²²Asangwa vyarabaye birtyo, igitugu canje kiragatandukana n’urubeshi, N’ukuboko kwanje gucike gutandukane n’igufa!

²³Kukw ivyago vyovuye ku Mana vyantera ubgoba, Narashishwa kubg’ igitinyiro cayo.

²⁴Asangwa naragize izahabu ivyizigiro vyanje, Nkabarira izahabu nziza, nti Ni wewe nishimiye;

²⁵Kand’ asangwa nanejerejwe n’uk’ ubutunzi bganje ari bginshi, Kandi yuk’ ukuboko kwanje kwaronse vyinshi;

²⁶Kand’ asangwa naritegereje izuba igihe ryaka, Cank’ ukwezi kugendera mu bgiza bgakwo,

²⁷Umutima wanje ugasukwa na vyo mu mpisho, Nkabiha ukuboko kwanje:

²⁸Ivyo na vyo vyoba ar’ ikibi co guhanirwa mu bacamanza, Kuko noba nihakanye Imana iri hejuru.

²⁹Asangwa naranejerejwe n’uk’ ūnyanka ageshejwe, Canke nkitereshwa hejuru n’ ukw ivyago bimushitseko,

³⁰Kand’ ari jewe nari narazitiye akanwa kanje ngo ntigacumure, Ntikamuvume ngo kamwifurize gupfa;

³¹Kand’ asangw’ abo mu rugo rwanje batavuga, Bati Ni nde yobona umuntu n’umwe atāhāgijwe n’inyama yagabura?

³²Kandi kw ata mushitsi narāje hanze, Arikw ingenzi nama ndayugururira;

³³Kand’ asangwa naratwikiriye ibicumuro vyanje nka Adamu, Ngahisha ibigabitanyo vyanje mu gikiriza,

³⁴Mbitewe no gutinya ishengero mu kigohe, No gutinya kugawa n’iyindi miryango, Bigatuma nihorera, sindenge n’irembo—

³⁵Icompa hakagira ūnyumviriza! Ivyo nireguje ndabitereye igikumu: Īshobora vyose n’ inyishure! Kand’ icompa nkabona ibirego vyanditswe n’umwansi wanje!

³⁶N’ukuri novyikorera ku rutugu, Nkavyipfundikako nk’igitsibo.

³⁷Noyimenyesha igitigiri c’intambuko zanje, Noyishikīra nk’uk’ umuganwa ashikīra umwami.

³⁸Asangwa mu bgatsi bganje hatakishwa no kundega, N’ubusize bgaho bukarira;

³⁹Kand’ asangwa narariye ivyeze vyaho ata co nishuye, Cank’ asangwa narishe nabi bene ho:

⁴⁰Asangwa vyarabaye birtyo, amahwa arakamera ahobaye ingano, N’ikigunda ahobaye sayiri. Amajambo ya Yobu agarukiye aho.