Read Bibliya Yera 1951 Yobu 32 Bible Online

Yobu 32 - Bibliya Yera 1951 bible

Yobu 32

¹Nukw abo bagabo ukw ari batatu bareka kwishura Yobu, kuko yibona kw ar’ umugororotsi ubgiwe.

²Maz’ uburake bga Elihu mwene Barakeli w’i Buzi, wo mu muryango wa Ramu, buraziriringa: buziriringira Yobu, kuko yīgize umugororotsi kurusha Imana.

³Kand’ uburake bgiwe buziriringira na ba bakunzi batatu ba Yobu, kuko batāronse ico bamwishura, yamara bakamuhinyura.

⁴Ariko Elihu yari yarīndiriye kuvugana na Yobu, kuko bāmuruta ubukuru.

⁵Maze Elihu abonye yukw abo batatu babuze icobava mu kanwa ngo bamwishure, uburake bgiwe buraziriringa.

⁶Nuko Elihu mwene Barakeli w’i Buzi aravuga, ati Jewe ndi muto, namwe murakuze cane: Ni co catumye nizitira, sinubahuke kubaserurira ico niyumvira.

⁷Naravuze, nt’ Abo ha mbere ni bo bakwiye kuvuga, Nt’ Abamaze imyaka myinshi ni bo bakwiye kwigisha ubgenge.

⁸Ariko har’ impwemu mu bantu, Kand’ ibihumetswe n’Īshobora vyose bibaha gutahura.

⁹Abakuze si bo banyabgenge bonyene, N’abatāma si bo bamenya imanza gusa.

¹⁰Ni co gitumye mvuga, nti Ni muntege amatwi, Nanje mbaserurire ico niyumvira.

¹¹Rāba, narīndiriye amajambo yanyu, Niteze ibiroranye vyova mu kanwa kanyu, Mukirondera ico mwovuga.

¹²Mbere nababangiye ugutwi, Ariko nta n’umwe muri mwebge yemeje Yobu, Canke ngw amwishure amajambo yiwe.

¹³Mwiyubare, mwoye kuvuga, muti Ni twebge twaronse ubgenge; Imana ni yo yoshobora kumutsinda, s’umuntu.

¹⁴Si jewe yaroreshejekw amajambo yiwe; Nanje sinomwishura amajambo nk’ayanyu.

¹⁵Ehe barumiwe, nta co bacishura: Ntibakigira ijambo bavuga.

¹⁶Mbega nobuzwa n’ukw ata co bavuga, Kuko bahagaze batakigira ico bishura?

¹⁷Jewe nanje ngira mvuge ivyanje, Ngira nserure ico niyumvira.

¹⁸Kukw amajambo anyuzuyemwo, Imbere muri jewe umutima uransunika.

¹⁹Inda yanje imeze nka vino itagira isaganirizo, Nk’imikuza y’insāto misha igira ngw iturike.

²⁰Ngira mvuge, kugira ngo ntenzukirwe; Ngira nteranure akanwa, nishure.

²¹Muntunge, mvuge ntarobanuye abantu ku butoni; Sinogira umuntu n’umwe nohema.

²²Kuko ntazi guhemana; Mbikoze, Umuremyi wanje yonkūraho bidatevye.