Read Bibliya Yera 1951 Yobu 36 Bible Online

Yobu 36 - Bibliya Yera 1951 bible

Yobu 36

¹Elihu ashishikara kuja imbere,

²ati Nyihanganira gato, nkwereke; Kuko ngifise bimwe mvuga ku ruhande rw’Imana.

³Ndahēmbēra akenge, naho kava kure, Nature ingen’ Umuremyi wanje agororoka.

⁴N’ukuri ivyo mvuga s’ibinyoma: Ūfise ubgenge bushitse ari kumwe nawe.

⁵Rāba, Imana n’inyabushobozi, kandi ntigira uwo ikēngēra n’umwe: N’inyabushobozi mu nkomezi z’ubgenge.

⁶Ntizigama ubugingo bg’abanyakibi, Impahazwa izicira imanza zibereye.

⁷Nta ho ikūra inyonga zayo ku bagororotsi, Arikw ibicarika hamwe n’ abami ku ntebe zabo Gushitsa ibihe bidashira, bagashirwa hejuru.

⁸Kand’ iyo baboheshejwe iminyororo, Bagashirwa mu ngoyi z’umubabaro;

⁹Ibamenyesha ibikorwa vyabo, N’ibicumuro vyabo, yuko bābikoreshejwe n’ubgibone.

¹⁰Kand’ izibūra amatwi yabo ngo bumve inyigisho, Ikabīhanikiriza ngo bagaruke bave mu bigabitanyo.

¹¹Ni bayumvira, bakayisaba, Bazomara imisi yabo baguwe neza, N’imyaka yabo bahimbawe.

¹²Ariko ni batayumvira, bazotikizwa n’inkota, Bazopfa batāmenye ubgenge.

¹³Kand’ abatubaha Imana mu mitima yabo bāmana umwikomo: Iyo ibaboshe ntibaruha bayitakambira.

¹⁴Bapfa bakenyutse, Kand’ ubugingo bgabo bugeserana n’abanduye.

¹⁵Ikirisha impahazwa uguhahazwa kwazo, Kand’ iziburisha amatwi yazo ukubabazwa kwazo.

¹⁶N’ukuri iba yaragukūye mu magorwa, Ikagushira ahantu hāgutse, hatari mu mbombane; Kand’ ibiterekeranijwe ku meza yawe biba vyuzuye ibinure.

¹⁷Arik’ urubanza rucirwa abanyavyaha rugushitseko kand’ ugeze: Urubanza rw’ukuri uciriwe ruragushikiriye.

¹⁸Wirinde, ishavu ryawe ntirihave rigutera kurogota, Kand’ ubginshi bg’incungu ntibugukebanure.

¹⁹Mbeg’ ugutakamba kwawe har’ ico kwokumarira ngo ntubone ivyago, Cank’ ubushobozi bg’inkomezi zawe?

²⁰Ntukifuze ijoro, Igihe amahanga acibga akava ahantu hayo.

²¹Witonde, woye gushira umutima ku vy’ukugabitanya: Kuk’ umenga ari vyo wahisemwo bikakurutira kubabazwa.

²²Rāba Imana ikora ibihambaye mu bushobozi bgayo: Umwigisha ahwanye na yo ni nde?

²³Ni nde yayigereye inzira icamwo? Canke ni nde yohangara kuyibarira, ati Wakoze ibitaroranye?

²⁴Ibuka gutazira ibikorwa vyayo, Ivyo abantu bahora baririmba.

²⁵Abantu bose bahora babirāba, Umuntu akavyitegereza ari kure yavyo.

²⁶Rāba Imana irahambaye, natwe ntituyizi; Igitigiri c’imyaka yayo ntigiserangurika.

²⁷Kukw idūza udutonyanga tw’ ikiduhu, Ikaduhindura ibicu bikagwisha imvura.

²⁸Ijuru rikayijogotereza, Ikagwa ku bantu benshi.

²⁹Mbega har’ uwoshobora gutahura ingen’ ibicu bikwiragira, Canke ngw atahure imituragaro iva mw ihema ry’ Imana?

³⁰Ikwiragiza imiravyo impande zayo zose; Kand’ itwikira hasi muri nyina w’ikiyaga.

³¹Kukw ivyo ari vyo ikoresha mu gucira amateka amahanga, Ikabizanisha ivyo kurya vy’ umurengera.

³²Yorosa intoke zayo umuravyo, Ikawubarira kugema ico ishinze.

³³Imituragaro y’inkuba imenyekanisha ivyayo, Inka na zo zikumva kw ikirura kije.