Read Bibliya Yera 1951 Yobu 37 Bible Online

Yobu 37 - Bibliya Yera 1951 bible

Yobu 37

¹Ivyo bihindisha agashitsi umutima wanje, Ukamvamwo.

²Ni mwumve yemwe, ni mwumvirize ukwivuga kw’ijwi ryayo, N’ukuririkiza kuva mu kanwa kayo.

³Igukwiza musi y’ijuru hose, N’imiravyo yayo ikayishitsa ku mpera z’isi.

⁴Hanyuma y’ivyo ijwi ryayo rirahinda, Igaturagarisha ijwi ry’icubahiro cayo: Ntirinda kuziganya imiravyo, ijwi ryayo rica ryumvikana.

⁵Imana ituragarisha ijwi ryayo bitangaje; Ikora ibikomeye tudashobora gutahura.

⁶Kukw ibarira shelegi,[6] iti Gwa kw isi; Ikabarira n’imvura y’umuvuvu, N’iy’ isegenya, iti Ni mukomere.

⁷Yugarana abantu bose, Kugira ngw abo yaremye bose babimenye.

⁸Ico gihe ibikōko binyegera mu bgihisho, Bikaguma mu masenga yavyo.

⁹Mu birēre vy’i bumanuko hava ikirura, N’imbeho ikava i burārūko.

¹⁰Urubura ruzanwa n’impwemu zihumetswe n’Imana, Maz’ amazi adengereye agafatana.

¹¹Mber’ ibicu bitwaye intunda ibiremereza amazi; Ibicu bisanzaza imiravyo yayo.

¹²Bikuba iserere nk’ukw igomba, Kugira ngo bikore ico ibigeze cose, Biri hejuru y’isi ibakw abantu:

¹³Ni yo ibirungika, ari bga nkoni ihanisha igihugu cayo, Cank’ ar’ uguhesha umugisha.

¹⁴Umve ibi, yewe Yobu: Hagarara, witegereze ibikorwa vy’Imana bitangaje.

¹⁵Mbeg’ urazi ingen’ Imana ibigera, N’ingen’ ibarira umuravyo w’igicu cayo kuravya?

¹⁶Cank’ urazi ingen’ ibicu bishigikiwe? Urazi ibikorwa bitangaje vy’ Iyizi ubgenge bgose?

¹⁷Cank’ imyambaro yawe igituma isusuruka, Igihe isi icereje kubg’ umuyaga uva i bumanuko?

¹⁸Mbega woshobora kwaganura ijuru ufatanije na yo, Kandi rikomeye nk’icirore cavugutiwe mu nkero?

¹⁹Enda twigishe ico twoyibarira; Kuko tubuzwa n’umwiza gutunganya amajambo yacu.

²⁰Mbega har’ uwoyibarira ko ngomba kugira ico mvuga? None har’ umuntu yokwifuza kumirwa miyonzwa?

²¹Kandi n’ubu abantu ntibashobora guhanga amaso umuco ukayanganira mw ijuru, Iy’ umuyaga uhise wēyūye ibicu.

²²I burārūko hava ubgiza bukayangana nk’izahabu; Imana yambaye igitinyiro giteye ubgoba.

²³Īshobora vyose nta ho twoshobora kuyiserangura: ifise ububasha bunyomoje; Kand’ ica imanza zibereye, igira ukugororoka kwinshi: Nta ho idendereza.

²⁴Ni co gituma abantu bayubaha; Nta ho ishira umutima ku muntu n’umwe yīgize umunyabgenge.