Read Bibliya Yera 1951 Yobu 38 Bible Online

Yobu 38 - Bibliya Yera 1951 bible

Yobu 38

¹Maz’ Uhoraho yishurira Yobu mu gashururu,

²at’ Uyo ni nde azimanganya inama Mu magambo atarimw’ ubgenge?

³Enda kenyera magabo! Kuko ngira nkubaze, nawe uheze unyishure.

⁴Mbega wewe wari hehe, igihe nashirah’ amatanguriro y’ isi? Bivuge, namb’ ufise ubgenge.

⁵Ni nde yatamvye amatambge yayo, namb’ ubizi? Canke ni nde yayigeresheje umugozi?

⁶Ibinogo vy’inkingi zayo vyimbururiwe mu ki? Canke ni nde yashizeh’ ibuye rigumya imfuruka,

⁷Igihe inyenyeri zo mu gaturuturu zāririmbira hamwe, N’abana b’Imana bose bagasēsereza impundu?

⁸Ni nde yugarije ikiyaga inzugi, Igihe cafyiruka nk’ikivuye mu nda?

⁹Igihe nagira ibicu imyambaro yaco, Nkakizingirak’ umwiza w’ umuzitanya nk’impuzu y’ uruyoya,

¹⁰Nkagishingira akarimbi, Nkagishirirah’ ibihindizo n’ inzugi,

¹¹Nkavuga, nti Garukira aha, ntuharēngāne: Nt’ Aha ni ho imipfunda yawe yīshira hejuru izogarukira?

¹²Mbeg’ aho wabereye, har’ aho wigeze kugera ko busambura, Ukarangira umutwenzi ahantu uhēra,

¹³Ngo na wo ufate imikugiro y’isi, Uyikunkumuremw’ abanyakibi?

¹⁴Isi ica irahinduka, nk’ukw ikibumbano giciye amagarwe kimera; Vyose bikaja ahabona nk’ ivyambaye.

¹⁵Kand’ abanyakibi bakwa umuco wabo, N’ukuboko kubanguwe kuravunika.

¹⁶Mbega warashitse mu masōko y’ikiyaga? Canke waragendagenze ahigobetse i bgina bgaco?

¹⁷Har’ aho weretswe amarembo y’urupfu? Cank’ amarembo y’igitūtu c’ urupfu har’ aho wigeze kuyabona?

¹⁸Mbega waratahuye ubgaguke bg’isi? Bivuge, namb’ ubizi vyose.

¹⁹Inzira ija i wabo w’umuco iri hehe? N’umwiza na wo ah’ uba ni hehe,

²⁰Kugira ng’ ubisubize aho bihānira imbibe, Kandi ng’ umenye inzira zija ku nzu zavyo?

²¹Ereg’ urabizi, kuko wari waravutse ico gihe, N’igitigiri c’imisi yawe kikaba cinshi!

²²Har’ aho wigeze gushika mu bubīko bga shelegi?[7] Cank’ urābona ububīko bg’ urubura,

²³Urwo nabīkiye igihe co kuzana amagorwa, Nkarubīkira umusi w’intambara no kurwana?

²⁴Inzira ijana ah’ ibishwarara vy’umuco bitangurira n’ iyihe? Cank’ inzira ijana ah’ umuyaga w’i burasirazuba uturuka, mu k’usāba kw isi?

²⁵Ni nde yaciriye isegenya imigende imanukana, Canke yaciriye umuravyo w’ inkuba inzira;

²⁶Kugira ngw arekurire imvura mu gihugu kitagiramw’ abantu, N’ubugaragwa butarimw’ umuntu n’umwe;

²⁷Ngw ahēmbūre ahantu h’ uruharabuga hagadutse, Ngw ahameze ubgatsi butotahaye.

²⁸Mbeg’ imvura iri na se? Canke ni nde yavyaye udutonyanga tw’ikime?

²⁹Urubura rwavuye mu nda ya nde? N’urume rw’igikonyozi ruva mw ijuru ni nde yarugīriye ku rwahi?

³⁰Amazi aravura, agacika nk’ ibuye, Amazi yo hejuru y’idamba agafatana.

³¹Mbega woshobora guhambira hamwe akarundo k’inyenyeri zitwa Kilimiya, Canke kubohora ingoyi z’ izitwa Oriyoni?

³²Woshobora kurōngōra za Mazaroti mu gihe cazo? Canke woyobora izitwa Arukuturo n’abana bazo?

³³Mbeg’ urazi ivyagezwe biganza ijuru? Woshobora gushinga uko riganza isi?

³⁴Woshobora gushira ijwi hejuru ngo rishikīre ibicu, Kugira ngw amazi y’isegenya akwitabe?

³⁵Woshobora gutuma imiravyo, ikagenda, Cank’ ikakwitaba, iti Sabge?

³⁶Ni nde yashize ubgenge mu mutima w’umuntu? Canke mu mushaha wiwe ni nde yahashize ugutahura?

³⁷Ni nde yogira ubgenge bgomushoboza guharūra ibicu? Canke ni nde yoshobora gucuranura amazi yo mu mibindi yo mw ijuru,

³⁸Igihe umukungugu uhinduka ivyondo, Ibinonko bikamatana hamwe?

³⁹Mbega woshobora guhīgira ingore y’intambge? Canke wohāza imigunza y’ intambge,

⁴⁰Igihe ziryamye mu masenga yazo, N’igihe zibunze mw ishamba ziteze ico zifata?

⁴¹Ni nde aronderera igikōna ivyo kurya, Igihe ivyana vyaco bitakambira Imana, Biyererezwa no kubura ico birya?