Read Bibliya Yera 1951 Yobu 39 Bible Online

Yobu 39 - Bibliya Yera 1951 bible

Yobu 39

¹Mbeg’ impene z’ibinyeshamba ziba mu bitandara urazi igihe zivyarira? Canke woshobora kuranga igihe impongokazi zivyarira?

²Woshobora kurīmbūra amezi zimara? Canke se womenya igihe zivyarira?

³Ziritunatuna, zikavyara abana bazo, Ukwērēra kwazo kugashira.

⁴Abana bazo barashisha, bagakurira mu gahinga; Bahwewe bakīgīra ukwabo, ntibazigarukeko.

⁵Ni nde yarekuye indogoba z’ ibinyeshamba ngo zigende aho zigomba? Canke ni nde yazizituye ku biziriko?

⁶Izo nahinduriye ubugaragwa ngo bube inzu yazo, N’igihugu c’umunyu ngo kibe ahantu ziba.

⁷Zitwenga urwamo rwo mu gisagara, Kandi ntizīgera zumva gukankamirwa n’ūziyoboye.

⁸Ku misozi ni ho zigendagenda zirisha, Zikarondera udutohera twose tw’ubgatsi.

⁹Mbeg’ imbogo yokwemera kugukorera? Canke yotahukira ku gicaniro cawe?

¹⁰Canke woshobora kuyambika umugozi ngw ikurimire ikivi? Canke se yogenda irakubiturura inyuma yawe mu myonga?

¹¹Mbega woyizigira kukw inkomezi zayo ari nyinshi? Canke woyisigarana igikorwa cawe?

¹²Woyishimira ko yokwegeranya ivyo wejeje ikabizana i muhira, Ikabirunda ku mbuga yawe?

¹³Igisīga citwa imbuni gikungutana amababa yaco kwiteragura; Ariko mbeg’ amababa yaco n’ amoya yaco bigira neza?

¹⁴Kuko kirekera amagi yaco hasi, Agashuhira mu mukungugu,

¹⁵Kikibagira kw ikirenge coshobora kuyafyonyagura, Canke kw igikōko coshobora kuyakandagira.

¹⁶Kirenga ivyana vyaco, nk’ ibitar’ ivyaco; Naho caruhiye ubusa ntikibibabara;

¹⁷Kukw Imana yacimye ubgenge, Ntigihe ingabire yo kumenya.

¹⁸Iyo kivudutse ciruka, Gikēngēra ifarasi n’ūyigenderako.

¹⁹Mbega ni wewe wahaye ifarasi inkomezi zayo? Canke ni wewe wambitse izosi ryayo umugāra uhungabana?

²⁰Ni wewe wayihaye gusimba nk’inzige? Erega gufuha kw’amanyama kwayo guteye ubgoba.

²¹Iy’ iri mu kiyaya irakoba, igahimbarwa n’inkomezi zayo; Ikaja gutega ingabo.

²²Itwenga ubgoba, ntiranduka umutima, Nta ho ikimirana ngw ihunge inkota.

²³Umutana ugenda ujegera kuri yo, Bo n’icumu ry’intēga rikayangana n’agakōbero.

²⁴Amakare yayo n’uburake bituma itemaguza imisozi, Kand’ iyo yumvise ijwi ry’ inzamba ntinatenyenya.

²⁵Uko yumvise inzamba kwose iravuga, iti Ha ha ha ha! Kand’ ihemba intambara ikiri kure, N’uguhinda kw’abagabisha n’ akāyaga.

²⁶Mbeg’ ubgenge bgawe ni bgo butuma agaca kaguruka, Iyo gashānje amababa yako aherekeye i bumanuko?

²⁷Mbeg’ ibgirizwa ryawe ni ryo rituma ikinyakabaka canikiza hejuru, Canke kikārika icāri caco hejuru kure?

²⁸Kiba mu bitandara, kikārikaho, No ku karungerunge kavyo, no mu masenga yavyo.

²⁹Kikir’ aho, gituma akajisho kirondera ico cofata; Amaso yaco akakibona kiri kure.

³⁰Ivyana vyaco na vyo binunuza amaraso; Kand’ ah’ imivyimba iri hose, ni ho kija.