Read Bibliya Yera 1951 Yobu 40 Bible Online

Yobu 40 - Bibliya Yera 1951 bible

Yobu 40

¹Uhoraho yongera kubaza Yobu,

²ati Mbeg’ umunyempāri yohāririza Īshobora vyose? Ūhāririza Imana, ni yishure!

³Maze Yobu yishura Uhoraho,

⁴ati Rāba ndi nta kimazi: nokwishura iki? Nifashe ku munwa.

⁵Mvuze rimwe, ariko singisubīra; Mbere ni kabiri, arikw aho ni ho ngarukiye.

⁶Maz’ Uhoraho yishurira Yobu mu gashururu,

⁷at’ Enda kenyera magabo! Ngira nkubaze, nawe uheze unyishure.

⁸Mbega woshingūra urwo nashinze? Wompenurirakw ibitari vyo kugira ng’ ubone urubanza?

⁹Canke se, unganya amaboko n’Imana? Woshobora guturagarisha ijwi nka yo?

¹⁰Enda ni wisakare ubgiza n’ ubukuru, Wambare icubahiro n’igitinyiro!

¹¹Sendereza uburake bgawe busebereye, Kandi witegereze umwibone wese, umucishe bugufi.

¹²Witegereze umwibone wese, umusubize hasi, Kand’ ufyonyorere abanyakibi aho bari.

¹³Ubashire mu mukungugu bose hamwe, Upfukire mu maso habo ahantu hatabona.

¹⁴Ni ho nanje nzokwemera Yuk’ ukuboko kwawe kw’i buryo kwoshobora kugukiza.

¹⁵Enda ni witegereze imvubu, iyo naremye nk’uko nakuremye; Irisha ubgatsi nk’inka.

¹⁶Ehe rāba, inkomezi zayo ziri mu masohoro yayo, N’ububasha bgayo buri mu mitsi yo mu nda.

¹⁷Izungagiza umurizo wayo udadaye nk’igiti c’isederi; Imitsi yo mu matako yayo irasobekeranye.

¹⁸Amagufa yayo ameze nk’imiheha y’imiringa; Ingingo zayo zimeze nk’ibihindizo vy’ivyuma.

¹⁹Mu vyaremwe n’Imana ni yo gakomeye; Iyayiremye ni yo yonyene yoshobora kuyishikiriza inkota.

²⁰N’ukuri imisozi iyimereza ivyo kurya, Ah’ ibikōko vyose vyo mw ishamba bikinira.

²¹Yiryamira musi y’ibiti vy’ intunda, Mu bgihisho bgo mu marenga no mu rufunzo.

²²Ibiti vy’intunda biyikwiza igitūtu; Ibiti bimeze i ruhande y’ umugezi birayikikiza.

²³Rāba, iy’ uruzi rwigize akagabo ntiruha ihinda agashitsi; Naho Yorodani rwoseberera ikaruhūhira ku munwa, ntibigira ikindi.

²⁴Mbega har’ uwoyifata iri maso, Cank’ akayifatisha urusenga ngw ayitobore izuru?