Read Bibliya Yera 1951 Yobu 41 Bible Online

Yobu 41 - Bibliya Yera 1951 bible

Yobu 41

¹Mbeg’ ingona woshobora kuyirobesha igera? Canke wofatisha ururimi rwayo umugozi?

²Woshobora kuyicisha umugozi w’umuhotora mu zuru? Canke wotoboza umubangabanga wayo uruhindu?

³Mbega yokwisaba mu majambo menshi, Canke yokubarira ikarambarara?

⁴Mbega yosezerana nawe, Ng’ uyisabishe ikubere umushumba imisi yose?

⁵Woyikinisha nk’ūkinisha inyoni? Mbega woyizirika ngw abanyakigo bagukorera bayikinishe?

⁶Mbeg’ igihari c’abarovyi coyidandaza? Coyikwiragiza mu bahanjuzi?

⁷Mbeg’ urusāto rwayo worushingagirakw imyampi y’ ingobe, Cank’ umutwe wayo kw amacumu yica amafi?

⁸Pfa kuyishirak’ ukuboko gusa! Uze wame wibuka intambara, ntuze wongere.

⁹Eh’ ivyizigiro vyo kuyifata nta vyo: Mbeg’ umuntu ntiyogwishwa igihūmura n’ukw ayirāvye gusa?

¹⁰Nta wogira ubuhizi bgotuma ahangara kuyikakaza: Nuko rero jewe ni nde yoshobora kumpagarara imbere?

¹¹Ni nde yabanje kugira ico ampa ngo ndamwishure? Ibiri musi y’ijuru vyose iyo riva rikagera n’ivyanje.

¹²Ingona sinoreka kuvuga amaguru yayo, Cank’ ububasha bg’inkomezi zayo, cank’ ubgiza bg’umutumba wayo.

¹³Ni nde yoshobora kuyikūrak’ umwambaro w’inyuma? Ni nde yokwishira hagati mu majigo yayo?

¹⁴Ni nde yoshobora kuyasamika akanwa? Gutera akōba gukikije amenyo yayo.

¹⁵Ibigaragamba vyayo vy’inkomezi ni vyo igenda yishinzako; Bigerekeranye hamwe nk’ ivyamatanijwe rwose.

¹⁶Uko kimwe gifatanye n’ikindi Bituma ata muyaga ushobora kubicamwo.

¹⁷Biramatanye kimwe ku kindi, Biromekanye uburyo bitoshoboka gutandukanywa.

¹⁸Kwasamura kwayo guca ibibatsi; Amaso yayo asa n’ugutambika kw’umutwenzi.

¹⁹Mu kanwa kayo havamw’ imuri zaka, Hagatarukamw’ ibisase vy’ umuriro.

²⁰Mu mazuru yayo hapfundukamw’ umwotsi, Nk’uw’ inkono ibiragira cank’ uw’ urukangaga rwaka.

²¹Impwemu zayo zidomeka amakara, Kandi mu kanwa kayo havamw’ ibirimi vy’umuriro.

²²Mw izosi ryayo habamw’ inkomezi; Gutera akōba kwayo kuyihamiriza imbere.

²³Inyama zo ku mubiri wayo ziramatanye: Ziyimaseko, ntizishobora gutentema.

²⁴Umutima wayo ukomeye nk’ ibuye: Mber’ ukomeye nk’urusyo.

²⁵Iyo yiburutse abahizi bahinda agashitsi, Ubgoba bukabasarisha.

²⁶N’uworamuka ayirwanishije inkota nta co vyomara: N’iyo ryoba icumu cank’ umugenyuzi cank’ umwampi w’ubukera.

²⁷Ivyuma ibigereranya n’ivyatsi, N’imiringa nk’ibiti bibongeye.

²⁸Umwampi ntushobora gutuma ihunga; Amabuye atewe n’umugozi[8] ayihindukira nk’ibishingwe.

²⁹Ubuhiri ibugereranya n’ibishingwe nyene: Itwenga imivuguvugu y’icumu.

³⁰Mu nda hayo hameze nk’injo zikarishe; Ah’ iciye mu vyondo ihasiga imikuku nk’ahaciye umusekuzo w’amenyo.

³¹Isebagiza mw idamba nk’ inkono ibiragira, Itagatisha ikiyaga nk’amavuta yo kwīsīga.

³²Inyuma yayo ihasiga inzira ikayangana; Womenga mw idamba hasheshe uruyenzi.

³³Nta kindi gihwanye na yo kiri kw isi, Yo yaremwe ar’ inshirabgoba.

³⁴Irābana agakēngērwe ibishizwe hejuru vyose; Ni yo mwami w’ibinyabgibone vyose.