Read Bibliya Yera 1951 Yobu 42 Bible Online

Yobu 42 - Bibliya Yera 1951 bible

Yobu 42

¹Maze Yobu yishura Uhoraho,

²ati Nzi yuk’ ushobora vyose, Kandi kw ata gishobora kubuza imigabo yawe.

³Uyo ni nde azimanganya inama ata bgenge agira? Erega ni co catumye mvuga ivyo ntatahuye, Nkavuga ibitangaza bindengeye ntazi.

⁴None ndakwinginze ni wumve, nanje mvuge: Ngira nkubaze, nawe umbarire.

⁵Nari narumvishije ivyawe ugutwi, Ariko noneh’ ijisho ryanje rirakwiboneye.

⁶Ni co kinteye kwizinukwa, nkihana Nigaragura mu mukungugu no mu munyota.

⁷Nuk’ Uhoraho amaze kubgira Yobu ayo majambo, Uhoraho abarira Elifazi w’i Temani, at’ Uburake bganje burakuziriringiye, mwe na bagenzi bawe bompi: kuko mutamvuzekw ibiroranye, nk’uk’ umusavyi wanje Yobu yagize.

⁸None rero ni mwijanire amashūri ndwi n’impfizi z’intama ndwi, muje ku musavyi wanje Yobu, mwitangire ibimazi vyoswa; kand’ umusavyi wanje Yobu azobasabira, kukw ari we nzokwemera, kugira ngo noye kubagirira nk’uk’ ubupfu bganyu bumeze; kuko mutamvuzekw ibiroranye, nk’uk’ umusavyi wanje Yobu yagize.

⁹Nuko Elifazi w’i Temani na Biludadi w’i Shuhi na Zofari w’i Nayama baragenda, bagira nk’uk’ Uhoraho yababariye: maz’ Uhoraho yumvira ugusenga kwa Yobu.

¹⁰Yobu agisengera bagenzi biwe, Uhoraho amukūrak’ uburushwa bgiwe, amushumbusha ibingana n’ivyo yar’ afise ibihetangabo kabiri.

¹¹Maz’ abo bavukana bose baraza, na bashiki biwe bose, n’abāri bāzinanyi na we bose ubga mbere, basangirira na we mu nzu yiwe; baje kumugarukirako no kumwirura kubg’ ivyago vyose Uhoraho yari yaramutēje; umuntu wese amuha ihera ryitwa kesita n’impeta y’ izahabu.

¹²Nuk’ Uhoraho aha Yobu umugisha mu gihe c’amaheruka kuruta ica mbere: aronka intama ibihumbi cumi na bine, n’ ingamiya ibihumbi bitandatu, n’ inka zirima ibihumbi bibiri, n’ indogoba zivyara igihumbi.

¹³Kand’ avyara n’abahungu ndwi n’abakobga batatu.

¹⁴Umukobga wa mbere amwita Yemima; uw’ ubuheta amwita Keziya; uwa gatatu amwita Kereni‐hapuki.

¹⁵Kandi mu gihugu cose nta bigeme bāri bahwanije akaranga n’ abakobga ba Yobu: nuko se abaraga hamwe na basaza babo.

¹⁶Hanyuma yaho, Yobu amara imyaka ijana na mirongwine, abona abana biwe n’abuzukuru biwe, gushitsa no ku buzukururuza.

¹⁷Nuko Yobu apfa yīsāziye, ageze mu zabukuru.