Read Bibliya Yera 1951 Yobu 5 Bible Online

Yobu 5 - Bibliya Yera 1951 bible

Yobu 5

¹Enda takamba: mbega har’ ūzokwishura? Ni nde wo mu bera wotabaza?

²Ereg’ igipfu ni co cicwa n’ umwikomo, N’imburabgenge ni yo yicwa n’ishari.

³Ubganje nabonye igipfu kiriko kirashōra imizi, Ubgo nyene mvuma ahantu kiba.

⁴Abana biwe bari kure y’ ubuhungiro; Bahonyorerwa mw irembo, Ata wo kubakiza.

⁵Ivyimburwa vyabo bimarwa n’abashonje, Mbere bajana n’ibimera mu mahwa, Kand’ abafise inyota bifuza ibintu vyabo.

⁶Kukw amarushwa atava mu mukungugu, Kandi n’ivyago bitamera biva mw ivu.

⁷Arik’ umuntu avukira amagorwa, Nk’ukw amasase atabura gutarukira mu kirēre.

⁸Arikw iyaba jewe, mba narambambiye Imana, Iryo mfise mba naryitwaye ku Mana;

⁹Ni yo ikora ibihambaye bidaserangurwa, N’ibitangaza bidaharūrika;

¹⁰Ni yo irekurira imvura kw isi, Igakwiza amazi mu ndimiro;

¹¹Ni yo ishira hejuru abaciye bugufi, N’abari mu mubabaro ibashira mu mahoro.

¹²Yica imigabo y’ingunge, Kugira ngw amaboko yazo ntāgire ingene yoyishitsa.

¹³Itegesha abanyabgenge ubugunge bgabo ubgabo, Kand’ inama z’ibidadi irazisāvya.

¹⁴Bahūra n’umwiza ari ku murango, Bakabakaba no mu mashōka nko mw ijoro.

¹⁵Arikw ikiza umugorwa inkota yo mu kanwa kabo, Mber’ imukiza ukuboko kw’ umunyenkomezi.

¹⁶Uko ni k’umworo agira ivyizigiro, Abagabitanya bakazibga akanwa.

¹⁷Hahirwa umuntu Imana ihana: Nuko rero ntukagaye igikangiro c’Ūshobora vyose.

¹⁸Kukw ari yo ikomeretsa, kand’ ikaba ari yo isomōra; Irakubita, kand’ amaboko yayo akaba ari yo atīmbūra.

¹⁹Izokurokora mu vyago bitandatu, Mbere no mu vyago ndwi nta kibi kizogukorako.

²⁰Muri kigoyi izogukiza urupfu, No mu ntambara igukize ubushobozi bg’inkota.

²¹Uzohishwa intega y’ururimi; Kandi ntuzotinya ubugesera buje.

²²Ubugesera n’amapfa uzobitwenga; Kandi ntuzotinya ibikōko vyo mw isi.

²³Kuk’ uzosezerana isezerano n’ amabuye yo mu gasozi; Kand’ ibikōko vyo mu gasozi bizokwuzura nawe.

²⁴Kand’ uzomenya yukw ihema ryawe rir’ amahoro: Uzogendura urugo rw’imikuku yawe, usange ata kibuze.

²⁵Kand’ uzomenya yuk’ uruvyaro rwawe ruzogwira, N’abagukomokako bakaba nk’ ivyatsi vyo ku misozi.

²⁶Uzoja mu mva wīsāziye neza, Nk’ikinyankinda bazana igihe kigeze.

²⁷Rāba, ivyo ni vyo twagenzuye, dusanga ari ko biri: Nawe n’uvyumve, wīkūriremw’ ivyokugirira ikimazi.