Read Bibliya Yera 1951 Yobu 6 Bible Online

Yobu 6 - Bibliya Yera 1951 bible

Yobu 6

¹Maze Yobu arishura,

²at’ Iyaba umwikomo wanje wāgerwa, N’ivyago vyanje bigashirwa ku munzane!

³Kuko vyari kuremēra kurusha umusenyi wo ku kiyaga: Ni co catumye nihutira kuvuga.

⁴Ereg’ imyampi y’Ūshobora vyose yantobekeranije, Ubugingo bganje bganyoye ubumara bgayo: Ibiteye ubgoba vy’Imana bitonze urugamba kundwanya.

⁵Mbeg’ indogoba y’inyeshamba yokwivuga iri n’ubgatsi? Cank’ inka yokwābira iri n’ ico irisha?

⁶Mbeg’ ikitaryoshe coribga kitarimw’ umunyu? Canke se, mu murenda w’irigi harimw’ icanga?

⁷Umutima wanje wanse kubikorako; Bimmereye nk’ivyo kurya biteye iseseme.

⁸Icompa nkaronka ico nsaba, Imana ikampa ico nifuza!

⁹Imana nyene ikemera kumfyonyora, Igatuma ukuboko kwayo igacacura imigozi inziritse!

¹⁰Aho ho ni ho noba ndonse ikinduhura, Mbere nokwiteraguzwa n’umunezero naho nagize uburibge budatenzura: Kuko ntāhakanye amajambo y’Uwera.

¹¹Mbeg’ inkomezi zanje n’inki ndorereye? Kand’ iherezo ryanje n’iriki nihanganira?

¹²Non’ inkomezi zanje ni nk’iz’ amabuye? Canke se umubiri wanje ni nk’umuringa?

¹³Mbega sinsigaye ntafise ikintabara, Ivy’ ugukira kwanje bikajanwa kure yanje?

¹⁴Ūdendebukiwe bikwiye kw atera akagongwe abakunzi biwe, Naho yoba aretse kwubaha Ūshobora vyose.

¹⁵Bagenzi banje babaye ba rusukabatungu nko mu mburamazi, Babaye nk’isūri yo mu mburamazi itemba igashira,

¹⁶Iciwe iyondoyondo n’urubura, Shelegi[1] ikīhishamwo;

¹⁷Haje agasusuruko, ikazimangana, Ubushuhe bgaza, igakamirikirira ahantu hayo.

¹⁸Igugu ry’abari ku rugendo ryājana inkōkoro yaho rirakevya; Badūga mu bugaragwa, bagwayo.

¹⁹Igugu ry’ab’ i Tema ryari ribīteze, Ingenzi z’i Sheba zari zibarorereye;

²⁰Bamāramāzwa n’uko bāri bavyizigiye, Bashitseyo baratētērwa.

²¹Noneho rero nta co mumaze; Mubonye ibiteye ubgoba, muratinya.

²²Mbega har’ aho nigeze kuvuga, nti Ni mugire ico mumpa? Canke nti Ni muntangire impongano mu bintu vyanyu?

²³Canke nti Ni mundokore munkūre mu maboko y’umwansi? Canke nti Ni muncungure munkūre mu maboko y’ abampahaza?

²⁴Ni munyigishe, nanje ni ho ndibuhore: Mummenyeshe ivyo nafuditse ivy’ ari vyo.

²⁵Ereg’ amajambo y’ukuri agira ububasha! Arikw ibihāri vyanyu bimaze iki?

²⁶Mbega muragomba guhinyura amajambo, Ayo uwihevye avuga amera nk’ibitwawe n’umuyaga?

²⁷Erega mwonapfindira impfuvyi, N’umukunzi wanyu mwomugura.

²⁸Enda kunda munyitegereze: N’ukuri sinobesha mu maso yanyu.

²⁹Ni mwirimbure, ndabinginze, hoye kuba ibifutamye; Mbere ni mwirimbure ukundi gusha, ivyanje n’ibigororotse.

³⁰Mbeg’ ururimi rwanje ruri n’ibifutamye? Akanwa kanje ntikazi gutandukanya ikibi?