Read Bibliya Yera 1951 Yobu 7 Bible Online

Yobu 7 - Bibliya Yera 1951 bible

Yobu 7

¹Mbeg’ umuntu akiri mw isi ntaba ari mu ntambara? N’imisi yiwe si nk’iy’ umucangero?

²Nk’uk’ umugurano yifuza igitūtu, N’umucangero akarereka ingero yiwe,

³Ni ko nahawe umugabane w’ amezi y’umwunamo, Kandi nashingiwe amajoro y’umuruho.

⁴Iyo ndyamye, ndavuga, Nti Buca ryari ngo mvyuke? Ndāra ndagaragurika bukarinda buca.

⁵Umubiri wanje utwikiriwe n’inyo, utaramyekw ivyomeke vy’umukungugu; Urukoba rwanje ruratarurira, rugasaduka.

⁶Imisi yanje irihuta kuruta ico umujishi w’impuzu ajishisha, Ishira ata vyizigiro.

⁷Ibuka se k’ubugingo bganje ar’ umuyaga gusa: Ijisho ryanje ntirigisubira kubona ivyiza ukundi.

⁸Ijisho ry’uwambona ntirigisubira kundāba; Amaso yawe uzoyanshirako, ariko nzoba ntakiriho.

⁹Nk’ukw igicu cēyūka kigakamangana, Ni ko n’ūmanuka aja mu kuzimu atazosubira kudūga ukundi.

¹⁰Ntazogaruka mu nzu yiwe ukundi, Kand’ aho yaba ntihazoba hakimwibuka ukundi.

¹¹Ni co gitumye ntiyumanganya; Ngira mvuge kubg’ umubabaro w’umutima wanje; Ndiganyira kubg’ akabonge ko mu mushaha wanje.

¹²Mbega nd’ ikiyaga? Canke se nd’ igikōko co mu kiyaga, K’unshinze abarinzi?

¹³Iyo mvuze, nt’ Uburiri bganje buzommara umubabaro, Ikirago canje kizonyorohereza amaganya;

¹⁴Na ho nyene unkangisha inzozi, Ukanca ivutu mu vyo neretswe;

¹⁵Bigatuma umutima wanje uhitamwo gupfuma nnigwa, Mpisemw’ urupfu kuruta kugumana aya magufa yanje.

¹⁶Kubaho kwanje ndakuzinutswe; singomba kuramba: Enda se n’umpumekere, kukw imisi yanje ata co imaze.

¹⁷Umuntu n’iki, ah’ umukuza, Ukamushirak’ umutima,

¹⁸Ukamugendera uko bukeye, Ukāma umugerageza na ntaryo?

¹⁹Uzogeza ryari kutankūrakw ijisho, Ng’ umpumekere, mmire amate?

²⁰Namba narakoze icaha, wewe nagutwaye iki ga Ngenzuzi y’abantu? N’iki gituma unshinga nk’ uruti rw’icumu utīmba, Bigatuma nirambirwa?

²¹Kandi n’iki gituma utamparira igicumuro canje, ng’ unkūrek’ ukugabitanya kwanje? Kuko vuba ngiye kuryama mu mukungugu, Nawe uzondonderana umwete, ariko nzoba ntakiriho.