Read Bibliya Yera 1951 Yobu 9 Bible Online

Yobu 9 - Bibliya Yera 1951 bible

Yobu 9

¹Maze Yobu arishura,

²ati N’ivy’ ukuri nzi kw ari ko biri: Arik’ umuntu yoshobora ate kuba umugororotsi imbere y’Imana?

³Igomvye kumubūranya Ntiyobona iryo kuyishura, haba na rimwe mu gihumbi.

⁴N’inyabgenge mu mutima, n’inyabushobozi mu nkomezi: Ni nde yayikomantajek’ umutima, akaroranirwa?

⁵Yimura ibisozi ntibibimenye, Ikavyubikana uburake bgayo.

⁶Itigitisha isi, igatirimuka ahantu hayo, Inkingi zayo zikanyiganyiga.

⁷Ibuza izuba ntirirase, N’inyenyeri ikazitwikira.

⁸Igaranzura amajuru iri yonyene, Ikagendera ku mikuba y’ ikiyaga.

⁹Irema inyenyeri zitwa Arukuturo na Oriyoni na Kilimiya, N’ibirēre vy’i bumanuko.

¹⁰Ni yo ikora ibihambaye bidaserangurika, Mbere n’ibitangaza bitoharūrika.

¹¹Rāba inca i ruhande sindayibone, Ikīrēngānira sindayimenye.

¹²Isūmira ico iteye: ni nde yoyikimiranya? Ni nde yoyibaza, at’ Ivyo ugira n’ibiki?

¹³Imana ntizokūrah’ uburake bgayo: Ingabo za Bgibone zubama musi yayo.

¹⁴None jewe noshobora nte kuyishura, No kuronka amajambo yo kuyibūranya?

¹⁵Naho noba mfise urubanza sinoyishura, Noyisaba imbabazi, kukw ari yo Mucamanza wanje.

¹⁶Naho notakamba, ikitaba, Sinokwizigira ko yokwumviriza ivyanje.

¹⁷Kukw imvunaguza igihuhuta, Ikanyongeranyakw ibikomere impōye ubusa.

¹⁸Ntinkundira guhumeka, Arikw inyuzuza umubabaro.

¹⁹Namba tuvuga inkomezi z’ umunyenkomezi, rāba na yo ni yo! Namba tuvuga ivyo kubūrana, ni nde yoyihamagaza?

²⁰Naho noba mfise urubanza, akanwa kanje nyene ni ko kontsindisha: Naho noba ntunganye, konyagiriza ubugorame.

²¹Na none ndatunganye! Sincibabaye; Ngaye ukubaho kwanje.

²²Vyose ni co kimwe: ni co gituma mvuga, Nt’ Irandurana ūtunganye n’ umunyakibi.

²³Icago ni caduka kikica abantu, Ipfa kwitwengera ivyago vy’ abatācumuye.

²⁴Isi itanzwe mu maboko y’ inkozi z’ibibi; Ikinga mu maso h’abacamanza b’isi; Namb’ atari yo, none yoba nde se?

²⁵Imisi yo kubaho kwanje irihuta kurusha impayamaguru: Irahunga, ariko nta ciza ibona.

²⁶Iridunya nk’ibitebo vy’inkorogoto bisoza, Nk’inkukuma[2] yirasa gufata ico ihīga.

²⁷Iyo mvuze, nti Hinge nirengagize amaganya yanje, Nēyūre mu maso hanje, hace:

²⁸Na ho nyene nca ntinya imibabaro yanje yose, Nkamenya yuk’ utazoncira urw’ abatācumuye.

²⁹Nzotsindwa: None rero n’iki gituma ntamishwa n’ubusa?

³⁰Naho nokwiyuhagiza shelegi,[3] Ngakaraba isabuni;

³¹Na ho nyene womvumbagaza mu muvo, Impuzu zanje zikanzinukwa.

³²Ereg’ Imana s’umuntu nkanje, ngo ndayishure, Ngo tujane tuje kubūrana.

³³Nta muhūza ariho hagati yacu Wo kudushirakw amaboko twempi ngo twuzure.

³⁴Noneho n’inkūrekw inkoni yayo, Igitinyiro cayo coye kuntera ubgoba.

³⁵Ni ho novuga ndayishize ubgoba; Kuko mu mutima wanje uko ndi atari ko mboneka.