Read Bibliya Yera 1951 Zaburi 103 Bible Online

Zaburi 103 - Bibliya Yera 1951 bible

Zaburi 103

¹Zaburi ya Dawidi. Mutima wanje, himbaza Uhoraho: Namwe ibimbamwo vyose, muhimbaze izina ryiwe ryera.

²Mutima wanje, himbaza Uhoraho; Ntiwibagire ivyiza yakugiriye vyose.

³Ni we aharira ibigabitanyo vyawe vyose, Agakiza indwara zawe zose,

⁴Agacungura ubugingo bgawe ngo ntibuje mu mahonero, Akakwambika imbabazi no kugirirwa neza nk’igitsibo,

⁵Agahāza ubukambge bgawe ivyiza, Agatuma usubira mu busore busha bumeze nk’ubg’ inkukuma.[15]

⁶Uhoraho akora ivy’ ukugororoka, Agacira imanza impahazwa.

⁷Yamenyesheje Mose inzira ziwe, Ibikorwa vyiwe yabimenyesheje Abisirayeli.

⁸Uhoraho yuzuye imbabazi, n’umunyabuntu, Ateba kuraka, agira ikigongwe cinshi;

⁹Ntazokwama ahana, Ntahorana uburake imisi yose.

¹⁰Ntiyatugiriye ibihwanye n’ ivyaha vyacu, Ntiyadushubirije mu nkōko ibihwanye n’ibigabitanyo vyacu.

¹¹Nk’ukw ijuru ryitanguye isi, Ni kw ikigongwe agirira abamwubaha kingana.

¹²Nk’ukw i burasirazuba hitanguye i burengerazuba, Uko ni ko yashize kure ibicumuro vyacu.

¹³Nk’uko se w’abana abagirira akagongwe, Ni k’Uhoraho akagirira abamwubaha.

¹⁴Kukw azi iremwa ryacu, Yibuka ko tur’ umukungugu.

¹⁵Umuntu we, imisi yiwe ni nk’iy’ ivyatsi, Nk’ishurwe ryo ku musozi ni ko yamuza.

¹⁶Kuk’ umuyaga uricako, rikaba rishize, Ahantu haryo ntiharimenye ukundi.

¹⁷Arikw imbabazi Uhoraho agirira abamwubaha zahereye kera hose, zikazoshitsa ibihe vyose, Kand’ ukugororoka kwiwe kuzoshitsa no ku buzukururuza babo;

¹⁸Ni kw agirira abitondera isezerano ryiwe, Bakibuka ivyagezwe vyiwe bakabikora.

¹⁹Uhoraho yahamangiye intebe yiwe mw ijuru: Ubgami bgiwe buganza vyose.

²⁰Muhimbaze Uhoraho, mwebge bamarayika biwe: Mwebge banyenkomezi nyinshi bashikisha ijambo ryiwe Kubangira ugutwi ijwi ry’ ijambo ryiwe.

²¹Muhimbaze Uhoraho, mwebge ngabo ziwe zose, Yemwe basavyi biwe bakora ibimuhimbara.

²²Muhimbaze Uhoraho, yemwe bikorwa vyiwe vyose, Mumuhimbarize ahantu hose aganza: Mutima wanje, himbaza Uhoraho.