Read Bibliya Yera 1951 Zaburi 104 Bible Online

Zaburi 104 - Bibliya Yera 1951 bible

Zaburi 104

¹Mutima wanje, himbaza Uhoraho. Uhoraho, Mana yanje, ur’ ūhambaye cane; Wisakaye igitinyiro n’icubahiro.

²Wifubika umuco nk’umwambaro; Ugaranzura ijuru nk’ihema.

³Ushinga inkingi z’insenge zawe mu mazi; Uhindura ibicu umukogote ugenderamwo; Ugendera ku mababa y’umuyaga.

⁴Uhindura abamarayika bawe imiyaga, Abasavyi bawe ubahindura umuriro waka.

⁵Washizeh’ amatanguriro y’isi, Ngo yoye kuzonyiganyizwa gushitsa ibihe bidashira.

⁶Wayoroshe ikiyaga nk’impuzu, Amazi areremba hejuru y’ imisozi miremire.

⁷Ahungishwa no gukankamira kwawe, Yirukishwa no guhinda kw’ inkuba yawe,

⁸Aca ku misozi, amanukana imyonga, Ashika mu kibanza wayagereye.

⁹Wayakubitiye ibango ngo yoye kurirēngāna, Kugira ngo ntagaruke, akarengera isi.

¹⁰Urungika amariba mu myonga, Imigezi itemba hagati y’ imisozi;

¹¹Ishokwa n’ibikōko vyose vyo mw ishamba, Indogoba z’inyeshamba zishira inyota.

¹²Inyoni n’ibisīga vyo mu kirēre biba kur’ iyo migezi, Bijwiragirira mu mashami.

¹³Imisozi uyirekurirakw imvura ivuye ku nsenge zawe, Isi ihāzwa n’ibivuye mu bikorwa vyawe.

¹⁴Umereza inka ubgatsi, Umeza imboga zo kugaburira abantu, Kugira ng’ ubakūrire umutsima mw ivu,

¹⁵Na vino inezereza imitima y’abantu, N’amavuta yo kuyagayagisha mu maso habo, Kandi ng’ umutsima uhe imitima y’abantu amagara.

¹⁶Ibiti vy’Uhoraho birahāga, Ibiti vy’amasederi vy’i Lebanoni yateye;

¹⁷Ivyo inyoni n’ibisīga vyārikakw ivyāri: Agasoza gafise inzu yako ku biti vy’akajwari.

¹⁸Imisozi miremire n’iy’ impene z’inyeshamba, Ibitandara n’ubuhungiro bg’ inkezi.

¹⁹Washireyeh’ ukwezi kumenyekanisha ibihe: Izuba rirazi iyo rirengera.

²⁰Uzana umwiza, hakaba ijoro: Ni ho ibikōko vyose vyo mu kibira bisokoroka bisōbōka.

²¹Imigunza y’intambge iroherana igomba ico yofata; Ku Mana ni ho ironderera ivyo kurya vyayo.

²²Izuba ryarasa, zikīgīra, Zikaryama mu masenga yazo.

²³Abantu bagasohoka, bakaja ku bikorwa vyabo, No mu butame bgabo, bakageza ku mugoroba.

²⁴Uhoraho we, ereg’ ibikorwa vyawe n’ivy’ uburyo bginshi! Vyose wabikoresheje ubgenge: Isi yuzuye ubutunzi bgawe.

²⁵Ehe kiriya kiyaga kinini cāgutse, Kirimw’ ibikwega inda hasi bitoharūrika, Ibikōko bito‐bito na binini‐binini.

²⁶Ni ho amāto agendera: Ni ho ingona[16] iba, wayiremye ngo yikinemwo.

²⁷Ivyo vyose biguhanga amaso, Kugira ng’ ubigaburire ivyo kurya vyavyo igihe kigeze.

²⁸Bitororokanya ivyo ubihaye: Upfumbaturura igipfunsi cawe, bigahāga ivyiza.

²⁹Uhisha mu nyonga hawe, bigahinda agashitsi: Ubikūramw’ impwemu, bigaca bipfa, Bikīsubirira mu mukungugu wavyo.

³⁰Urungika impwemu yawe, bikaremwa; Uhindura isi, igasubira itōto.

³¹Icubahiro c’Uhoraho ni cameh’ ibihe bidashira; Uhoraho n’anezererwe ibikorwa vyiwe:

³²Arāba isi, igahinda agashitsi; Akora ku misozi, igafumba umwotsi.

³³Nzokwama ndirimbira Uhoraho nkiriho, Nzokwama ndirimbira Imana yanje ishimwe ngihumeka.

³⁴Ivyo niyumvira biyiryohere: Nanje nzokwama nnezererwa Uhoraho.

³⁵Abanyavyaha ni bahone bashire mw isi: Ababi boye kubah’ ukundi. Mutima wanje, himbaza Uhoraho. Haleluya.[17]