Read Bibliya Yera 1951 Zaburi 105 Bible Online

Zaburi 105 - Bibliya Yera 1951 bible

Zaburi 105

¹ Ni mushime Uhoraho, mwambaze izina ryiwe; Mumenyekanishe ibikorwa vyiwe mu mahanga.

²Mumuririmbire, mumuririmbire ishimwe; Muvuge ibikorwa vyiwe vyose bitangaje.

³Mwirate izina ryiwe ryera, Imitima y’abarondera Uhoraho inezerwe.

⁴Murondere Uhoraho n’inkomezi ziwe; Murondere mu nyonga hiwe ibihe bidashira.

⁵Mwibuke ibikorwa vyiwe bitangaje yakoze, Ibitangaza vyiwe n’amateka yo mu kanwa kiwe,

⁶Yemwe ruvyaro rwa Aburahamu umusavyi wiwe, Yemwe bana ba Yakobo, abo yatoranije.

⁷Uhoraho ni we Mana yacu; Amateka yiwe ari mw isi yose.

⁸Yama yibuka isezerano ryiwe imisi yose; Ijambo yashinze yama aryibuka uk’ urunganwe rugenda rukurikirana gushitsa ibihe igihumbi,

⁹Ni ryo sezerano yasezeranye na Aburahamu, Indahiro yarahiye Isaka,

¹⁰Akayongera kuri Yakobo ayitsindagira, ngw ibe icagezwe, Kuri Isirayeli ngw ibe isezerano ry’intahava;

¹¹Akavuga, ati Ni wewe nzoha igihugu c’i Kanani, Ngo kibe ishamvu mukubitiwe amabango.

¹²Bāri bakir’ abantu b’imparūrwa, Mbere bāri bake cane, kand’ ar’ inyambukīra muri co,

¹³Bāyerēra, bava mw ihanga baja mu rindi, Bava ku mwami umwe baja mu bundi bgoko.

¹⁴Ntiyakundira umuntu n’umwe kw abazingirikira, Mbere yahannye abami ababahōra,

¹⁵Ati Ntimukore ku bo narobanuje amavuta, Ntimugire ico mugira abavugishwa nanje.

¹⁶Ahamagara amapfa ngw atere mu gihugu; Avuna inkoni yose bishimikije, ni vyo vyo kurya vyabo.

¹⁷Atuma umuntu wo kubītangira imbere, Ni Yosefu yaguzwe ngw agirwe umuja:

¹⁸Bababarisha ibirenge vyiwe iminyororo, Bamushira mu vyuma.

¹⁹Kugeza ah’ iryavuzwe n’ Uhoraho ryashikiye, Ijambo ryiwe ryaramugerageza.

²⁰Umwami yaratumye, baramubohora, Segaba w’amahanga yaramurekuye.

²¹Amuhindura umuzezwarugo wiwe, Amugira segaba kw itunga ryiwe ryose.

²²Ngw agabe abaganwa biwe ukw agomba, Yigishe abakuru biwe ubgenge.

²³Kandi Isirayeli aja muri Egiputa, Yakobo agerēra mu gihugu ca Hamu.

²⁴Kand’ Uhoraho agwiza abantu biwe cane, Abagira abanyenkomezi kurusha abansi babo.

²⁵Ahindura imitima ya bano ngo banke abantu biwe, Bagīra icenge abasavyi biwe.

²⁶Atuma Mose umusavyi wiwe, Na Aroni yatoranije.

²⁷Bashira hagati muri bo ibimenyetso vyiwe, Bakorera ibitangaza mu gihugu ca Hamu.

²⁸Arungika umwiza, burakorana, Na bo ntibārenga amajambo yiwe.

²⁹Ahindura amazi yabo amaraso, Yica amafi yabo.

³⁰Igihugu cabo kinyagaramw’ ibikere, No mu ngoro z’abami babo.

³¹Avuga ijambo, hatera amasinzi y’ibibugu, N’imibu mu gihugu cabo cose.

³²Abarungikira urubura mu gishingo c’imvura, N’umuriro ururumba mu gihugu cabo.

³³Akubita imizabibu yabo n’ insukoni zabo, Avunagura ibiti vyo mu gihugu cabo.

³⁴Avuga ijambo, inzige ziratera, N’inzikira[18] zidaharūrika.

³⁵Zirya ibimera vyose vyo mu gihugu cabo, Zirya ivyeze mu mirima yabo.

³⁶Ageseza abana b’imfura bose bo mu gihugu cabo, Amara ubuzibūra bgabo.

³⁷Akūramwo Abisirayeli, bafise amafeza n’amazahabu, Nta munyantege nke yari mu miryango yabo yose.

³⁸Babonye bagiye, haba umunezero muri Egiputa, Kuko gutera ubgoba kwabo kwari kubafashe.

³⁹Agaranzura igicu co kubatwikira, N’umuriro wo kubamurikira mw ijoro.

⁴⁰Barasaba, azana inkware, Abahimvya umutsima wo mw ijuru.

⁴¹Atobora igitandara, amazi aradudubiza, Atemba ahantu hagadutse nk’ uruzi.

⁴²Kuko yibutse ijambo ryiwe ryera, Na Aburahamu umusavyi wiwe.

⁴³Akūray’ abantu biwe banezerewe, Abo yatoranije abakūrayo baririmba.

⁴⁴Abaha ibihugu vy’abanyamahanga, Batwara ivyo abanyamahanga bācumukuriye:

⁴⁵Aho vyaba birtyo kwar’ ukugira ngo bitondere ivyagezwe vyiwe, Bagendere mu vyo yashinze. Haleluya!