Read Bibliya Yera 1951 Zaburi 106 Bible Online

Zaburi 106 - Bibliya Yera 1951 bible

Zaburi 106

¹Haleluya! Ni mushimire Uhoraho yukw ari mwiza: Kukw imbabazi ziwe zamah’ ibihe bidashira.

²Ni nde yoshobora kudondora ibikorwa bikomeye Uhoraho yakoze, Canke kwerekana ishimwe ryiwe ryose?

³Hahirwa abitondera ibitunganye, Hahirwa uwama akora ivyo kugororoka na ntaryo.

⁴Uhoraho, nyibukana imbabazi ugirira abantu bawe; Ungenderanire agakiza kawe:

⁵Kugira ngo mbone ugutotahara kw’abo watoranije, Mpimbarwe n’umunezero w’ abantu bawe, Niratane n’ishamvu yawe.

⁶Twaracumuye, nka ba sogokuruza, Twaragabitanije, twakoze ivyaha.

⁷Ba sogokuruza ntibātahuye ibitangaza vyawe wakoreye muri Egiputa; Ntibibutse isinzi ry’imbabazi zawe, Ariko bagaraririza ku kiyaga, ni co Kiyaga Gitukura.

⁸Yamara kubg’ izina ryayo irabakiza, Kugira ngw imenyekanishe ubushobozi bgayo bukomeye.

⁹Ikankamira Ikiyaga Gitukura, kirakama: Nukw ibacisha ahār’ i bgina nko mu bugaragwa.

¹⁰Ibakiza ukuboko kw’umwansi wabo, Irabacungura, ibakūra mu kuboko kw’umurwanizi.

¹¹Amazi arengera ababisha babo, Ntihasigara n’umwe.

¹²Maze bizera amajambo yayo; Baririmba ishimwe ryayo.

¹³Ariko bibagira n’ingoga ibikorwa yakoze, Ntibarorēra kw ishitsa imigabo yayo.

¹⁴Ariko bifuriza cane mu bugaragwa, Bageragereza Imana mu karēre.

¹⁵Ibaha ico basavye, Arikw imitima yabo iyishiramwo kwonda.

¹⁶Kandi bagiririra Mose ishari aho bari bashagaje, Na Aroni, uwera w’Uhoraho.

¹⁷Isi irāsama, imira Datani, Iteranira ku bantu ba Abiramu.

¹⁸Umuriro udomekwa mw ikoraniro ryabo, Ikirimi cawo kiyigiza abanyakibi.

¹⁹Bacurira imasa i Horebu, Basenga igishushanyo bāvugutiye mu nkero.

²⁰Uko ni ko bākāvye icubahiro cabo Igishushanyo c’impfizi irisha ubgatsi.

²¹Bibagira Imana, Umukiza wabo, Yakoreye ibikomeye muri Egiputa;

²²Yakoreye ibitangaza mu gihugu ca Hamu, N’ibiteye ubgoba ku Kiyaga Gitukura.

²³Bituma ivuga kw izobahonnya, Kand’ iba yarabahoneje, iyaba Mose uwatoranijwe na yo atāhagaze imbere yayo mu gihengeri, Kugira ngw asubize inyuma uburake bgayo, yoye kubahonnya.

²⁴Kandi bāgaya igihugu c’ igikundiro, Ntibizera ijambo ryayo:

²⁵Ariko bidodombera mu mahema yabo, Ntibumvira Uhoraho.

²⁶Bituma amanika ukuboko, arabarahira Yukw azobatsinda mu bugaragwa,

²⁷Kandi kw azotsinda uruvyaro rwabo mu mahanga, Akarushwiragiriza mu bihugu.

²⁸Kandi bifatanya na Bayali‐Peyori, Barya ivyaterekerejwe imizimu.

²⁹Uko ni ko bāmurakishije ibikorwa vyabo; Ikīza kirabūbīra.

³⁰Maze Finehasi ava hasi ashitsa urubanza rwaciwe: Ikīza kirashira.

³¹Abiharūrwako nko kugororoka Uk’ urunganwe rugenda rukurikira urundi gushitsa ibihe bidashira.

³²Kandi barakiriza Uhoraho ku mazi y’i Meriba, Bituma Mose aterwa ivyago kubgabo:

³³Kuko bāgararije Mpwemu w’Uhoraho, Bituma Mose avugisha akanwa kiwe ibitabereye.

³⁴Kandi ntibāhonnya amahanga, Nk’uk’ Uhoraho yabageze.

³⁵Ariko bivangavanga n’amahanga, Biga ingeso zayo.

³⁶Baba abasavyi b’ibigirwamana vyayo, Bibahindukira umutego.

³⁷Mbere batanga kw ibimazi abahungu babo n’abakobga babo babaha abadayimoni,

³⁸Bavisha amaraso y’aberanda, ni yo maraso y’abahungu babo n’ay’ abakobga babo, Abo batanze kw ibimazi babaha ibigirwamana vy’i Kanani, Igihugu gihumanywa n’amaraso.

³⁹Uko ni ko bandujwe n’ ibikorwa vyabo, Bagenda bahurumba nk’ ibimaka mu ngeso zabo.

⁴⁰Bituma uburake bg’Uhoraho buziriringira abantu biwe, Yanka urunuka ishamvu yiwe.

⁴¹Abashira mu maboko y’abanyamahanga, Ababanka barabaganza.

⁴²Kand’ abansi babo barabahahaza, Bamarwa igabo, baba musi y’ukuboko kwabo.

⁴³Yahora abakiza kenshi, Ariko bakamugarariza mu migabo yabo, Bagacishwa bugufi kubg’ ukugabitanya kwabo.

⁴⁴Yamara yashira umutima ku mubabaro wabo, Uko yumvise ugutakamba kwabo:

⁴⁵Akabibukira isezerano yabasezeraniye, Akagarukana umutima, nk’ ukw isinzi ry’imbabazi ziwe riri.

⁴⁶Agatuma batera akagongwe Abābajanye kw inyagano bose.

⁴⁷ Udukize, Uhoraho Mana yacu, Udutororokanye mu mahanga, Kugira ngo dushime izina ryawe ryera, Twirate ishimwe ryawe.

⁴⁸Uhoraho, Imana y’Abisirayeli, n’ashemagizwe Nk’uko vyamye uhereye kera hose, ugashitsa ibihe bidashira. Kand’ abantu bose ni bavuge, bati Amen. Haleluya!