Read Bibliya Yera 1951 Zaburi 107 Bible Online

Zaburi 107 - Bibliya Yera 1951 bible

Zaburi 107

¹Ni mushimire Uhoraho yukw ari mwiza: Kukw imbabazi ziwe zamah’ ibihe bidashira.

²Abacunguwe n’Uhoraho ni bavuge bartyo, Abo yacunguye, akabakūra mu kuboko kw’umwansi;

³Akabatororokanya mu bihugu, I burasirazuba n’i burengerazuba, I burārūko no ku kiyaga.

⁴Bāyerereye mu bugaragwa, mu nzira ica mu karēre, Ntibābona igisagara co kubamwo.

⁵Bishwe n’inzara n’inyota, Imitima yabo igwa isari.

⁶Maze batakambira Uhoraho mur’ ayo magorwa yabo, Abakiza amarushwa yabo.

⁷Abarōngōra mu nzira igororotse, Kugira ngo bashike mu gisagara co kugerēramwo.

⁸Abo ni bashimire Uhoraho ukugira neza kwiwe, N’ibikorwa bitangaje yakoreye abana b’abantu!

⁹Kukw ahāza umutima ufise inyota, N’umutima ushonje awuzuza ivyiza.

¹⁰Abandi bicara mu mwiza no mu gitūtu c’urupfu, Baboheshejwe umubabaro n’ ivyuma;

¹¹Kuko bāgararije amajambo y’Imana, Bagakēngēra imigabo y’Īsumba vyose.

¹²Kubg’ ivyo ituma imitima yabo icishwa bugufi n’ ubutame, Bagatemba, ntihagire ūbatabara.

¹³Maze batakambira Uhoraho mur’ ayo magorwa yabo, Abakiza amarushwa yabo.

¹⁴Abakūra mu mwiza no mu gitūtu c’urupfu, Aca iminyororo yabo.

¹⁵Abo ni bashimire Uhoraho ukugira neza kwiwe, N’ibikorwa bitangaje yakoreye abana b’abantu!

¹⁶Kuko yamennye inzugi z’ imiringa, Akavunagura ibihindizo vy’ ivyuma.

¹⁷Ibijuju bibabarizwa ibicumuro vyavyo N’ukugabitanya kwavyo.

¹⁸Imitima yabo ihura ivyo kurya vy’imyuga yose; Bakēgēra amarembo y’urupfu.

¹⁹Maze batakambira Uhoraho mur’ ayo magorwa yabo, Abakiza amarushwa yabo.

²⁰Arungika ijambo ryiwe, akabakiza indwara, Akabakiza kuja mu vyobo vyabo.

²¹Abo ni bashimire Uhoraho ukugira neza kwiwe, N’ibikorwa bitangaje yakoreye abana b’abantu!

²²Ni batange ibimazi vyo gukenguruka, Bakwize ibikorwa vyiwe mu kuvuza impundu.

²³Abamanuka baja mu kiyaga bakagendera mu māto, Bakadandariza mu mazi agaranzutse,

²⁴Abo babona ibikorwa vy’ Uhoraho, N’ibitangaza vyiwe mw idamba.

²⁵Kukw avuga ijambo, akavyura inkūbi y’umuyaga, Ishira hejuru imipfunda yaho.

²⁶Baradūga, bakaja nko kw ijuru, Barasubira bagacokera, bakaja nk’i bgina: Imitima yabo ikayagishwa n’ umubabaro.

²⁷Bakazungazunga irya n’ino, bakadandabagirana nk’ imborerwa, Ubgenge bgabo bgose bukazimira.

²⁸Maze batakambira Uhoraho mur’ ayo magorwa yabo, Abakiza amarushwa yabo.

²⁹Inkūbi y’umuyaga ayihindura agahwekere, Bituma imipfunda yaho itekereza.

³⁰Maze banezerezwa n’uko habaye agacerere, Agaheza akabashikana mu cambu bagomba.

³¹Abo ni bashimire Uhoraho ukugira neza kwiwe, N’ibikorwa bitangaje yakoreye abana b’abantu!

³²Ni bamushemagirize mw ikoraniro ry’abantu, Bamushimire ah’ abakuru bicaye.

³³Ahindura inzūzi ubugaragwa, N’amasōko ayahindura ahagadutse:

³⁴Igihugu kimera agihindura akarēre k’umunyu, Kubg’ ivyaha vy’abahaba.

³⁵Kand’ ahindura ubugaragwa ikidengeri, N’ahagadutse ahahindura amasōko.

³⁶Aho ni ho agerēra abashonje, Kugira ngo bubake igisagara co kubamwo,

³⁷Babibe imbibe, batere imizabibu, Kugira ngo bironkere ivyeze bikikimvye.

³⁸Akabaha umugisha, bakagwira cane, Ntakundira inka zabo ko zikeha.

³⁹Kand’ iyo bagerutse, bagahetamishwa No guhahazwa n’amagorwa n’umubabaro,

⁴⁰Asuka agakēngērwe ku bahambaye, Abayerereza mu bigunda bitagira inzira.

⁴¹Agashira hejuru umukene, amukūye mu marushwa, Akamugwiriza imiryango nk’ umukuku.

⁴²Abagororotsi bazobibona banezerwe, Ubugāba bgose bgizibe akanwa.

⁴³Ūgira ubgenge wese azoshira umutima kur’ ivyo, Kandi bazokwitegereza imbabazi z’Uhoraho.