Read Bibliya Yera 1951 Zaburi 115 Bible Online

Zaburi 115 - Bibliya Yera 1951 bible

Zaburi 115

¹Ntabe ari twebge, Uhoraho, ntabe ari twebge, Arikw izina ryawe abe ari ryo uha icubahiro, Kubg’ imbabazi zawe n’ ukuri kwawe.

²N’iki gituma abanyamahanga babaza, Ngw Imana yabo iri hehe?

³Arikw Imana yacu iri mw ijuru, Yakoze ibiyihimbaye vyose.

⁴ Ibigirwamana vyabo n’ifeza n’izahabu, N’ibikorwa n’amaboko y’abantu.

⁵Bifise akanwa, ntibivuga, Bifise amaso, ntibibona,

⁶Bifise amatwi, ntivyumva, Bifise amazuru, ntibimoterwa,

⁷Bifise intoke, nta co bikorakora, Bifise ibirenge, ntibigenda, Kandi ntibivugisha imihogo yavyo.

⁸Ababikora bazohwana na vyo, Mbere n’ūvyizigira wese.

⁹Yemwe Bisirayeli, ni mwizigire Uhoraho: Ni we mutabazi wabo n’ inkinzo yabo.

¹⁰Yemwe ab’ inzu ya Aroni, ni mwizigire Uhoraho: Ni we mutabazi wabo n’ inkinzo yabo.

¹¹Yemwe abubaha Uhoraho, ni mwizigire Uhoraho: Ni we mutabazi wabo n’ inkinzo yabo.

¹²Uhoraho aratwibutse; azoduha umugisha; Azoha umugisha ab’ inzu ya Isirayeli, Azoha umugisha ab’ inzu ya Aroni,

¹³Azoha umugisha abubaha Uhoraho, Aboroshe n’abahambaye.

¹⁴Uhoraho abagwize abūhīre, Abagwizanye n’abana banyu.

¹⁵Muhawe umugisha n’Uhoraho, Yaremye ijuru n’isi.

¹⁶Amajuru n’amajuru y’Uhoraho, Arikw isi yayihaye abana b’abantu.

¹⁷Abapfuye ntibahimbaza Uhoraho, Cank’ abamanuka, baja ahantu h’agacerere.

¹⁸Ariko tweho tuzohora dushemagiza Uhoraho, Uhereye none, ugashitsa ibihe vyose. Haleluya!