Read Bibliya Yera 1951 Zaburi 116 Bible Online

Zaburi 116 - Bibliya Yera 1951 bible

Zaburi 116

¹Nkunda Uhoraho, kuko yumvise Ijwi ryanje n’ukwinginga kwanje.

²Kuko yanteze ugutwi, Ni co gituma nzokwama ndamwambaza nkiriho.

³Ingoyi z’urupfu zaranyizingiriyeko, Uburibge bg’i kuzimu bgaramfashe: Mbona ivyago n’umubabaro.

⁴Maze nambaza izina ry’Uhoraho, Nt’ Uhoraho, ndakwinginze, rokora ubugingo bganje.

⁵Uhoraho n’umunyabuntu, kandi n’umugororotsi: Ek’ Imana yacu n’inyembabazi.

⁶Uhoraho azigama abatungu: Nacishijwe bugufi, arankiza.

⁷Mutima wanje, subira mu buruhukiro bgawe; Kuk’ Uhoraho yakugiriye neza.

⁸Kuk’ Uhoraho, wakijije ubugingo bganje urupfu, Amaso yanje ukayakiza amosozi, N’ibirenge vyanje ukabikiza gutsitara.

⁹Nzogendera mu nyonga z’ Uhoraho Mw isi y’abakiriho.

¹⁰Nari nizeye, hamwe navuga, Nti Narababajwe cane,

¹¹Nkavuga ndandamutse, Nt’ Abantu bose n’abanyabinyoma.

¹²Ivyiza Uhoraho yangiriye vyose Ndabimwishura iki?

¹³Ndābīra igikombe c’agakiza, Nambaze izina ry’Uhoraho.

¹⁴Uhoraho nzomushitsakw amasezerano yanje, Mbere nzoyashitsa mu maso y’abantu biwe bose.

¹⁵Urupfu rw’abakunzi biwe N’urw’ igiciro mu nyonga z’Uhoraho.

¹⁶Uhoraho, n’ukuri nd’ umusavyi wawe; Nd’ umusavyi wawe, umwana w’incoreke yawe. Wankūye mu ngoyi.

¹⁷Nzogushikanira ikimazi co gukenguruka, Nambaze izina ry’Uhoraho.

¹⁸Uhoraho nzomushitsakw amasezerano yanje; Mbere nzoyashitsa mu maso y’abantu biwe bose;

¹⁹Mu nyubakwa zo ku ngoro y’Uhoraho, Hagati muri wewe, Yerusalemu. Haleluya!