Read Bibliya Yera 1951 Zaburi 119 Bible Online

Zaburi 119 - Bibliya Yera 1951 bible

Zaburi 119

¹[20] Hahirwa abagenda batunganye, Bakagendera mu vyagezwe vy’Uhoraho.

²Hahirwa abitondera ivyo yihanikirije, Bakamurondeza umutima wose.

³Mbere nta c’ukugabitanya bakora, Bagendera mu nzira ziwe.

⁴Washinze amateka yawe Kugira ngo tuyitonderane umwete.

⁵Icompa inzira zanje zigashikama Kugira ngo nitondere ivyo washinze.

⁶Aho nzoshirira umutima ku mabgirizwa yawe yose Ni ho ntazomāramāra.

⁷Nzogushimisha umutima utunganye Ni namara kwiga imanza zawe ziroranye zibereye.

⁸Nzokwitondera ivyo washinze: Ntunte ngo mbe ruhebga.

⁹Umusore azokwezesha inzira yiwe iki? Azoyezesha kuyitondera nk’ ukw ijambo ryawe rivuga.

¹⁰Nakurondeje umutima wanje wose; Ntukunde ko mpusha ngo mve mu mabgirizwa yawe.

¹¹Nabītse ijambo ryawe mu mutima wanje Ngo noye kugucumurako.

¹²Uhoraho, ur’ uwo gushemagizwa: Unyigishe ivyo washinze.

¹³Namamaje n’iminwa yanje Imanza zose ziroranye z’ akanwa kawe.

¹⁴Nanezererewe inzira y’ivyo wihanikirije Nk’uko nnezererwa ubutunzi bgose.

¹⁵Nzokwiyumvira amateka washinze, Kandi nzoshira umutima ku nzira zawe.

¹⁶Nzonezererwa ivyo washinze, Sinzokwibagira ijambo ryawe.

¹⁷Ugirire neza umusavyi wawe, kugira ngo mbeho, Nanje nzokwitondera ijambo ryawe.

¹⁸Hwezesha amaso yanje, Kugira ngo mbone ibitangaza vyo mu vyagezwe vyawe.

¹⁹Nd’ inyambukīra mw isi: Ntumpishe amabgirizwa yawe.

²⁰Umutima wanje umenaguwe n’igihahamizi Ugirira imanza zawe ziroranye ibihe vyose.

²¹Wahannye abibone, ari bo bivume, Bahusha bakava mu mabgirizwa yawe.

²²Unkūrekw agakēngērwe n’ umugayo; Kuko nitondeye ivyo wihanikirije.

²³Nah’ abahambaye bicaye bangīra imigabo, Umusavyi wawe niyumvira ivyo washinze.

²⁴Kand’ ivyo wihanikirije na vyo birampimbara, Ni vyo bajanama banje.

²⁵Umutima wanje wamatanye n’umukungugu; N’ungire muzima, nk’ukw ijambo ryawe ryavuze.

²⁶Nakwīgāniye inzira zanje, uranyishura: N’unyigishe ivyo washinze.

²⁷Untahuze inzira y’amateka washinze, Ni ho nzokwiyumvira ibikorwa vyawe bitangaje.

²⁸Umutima wanje ushongeshejwe n’umubabaro: Ndemesha, nk’ukw ijambo ryawe ryavuze.

²⁹Inzira y’ibinyoma n’ibe kure yanje: Umpere ubuntu ivyagezwe vyawe.

³⁰Mpisemw’ inzira yo kuba umwizigirwa: Nashize imanza zawe ziroranye imbere yanje.

³¹Namatanye n’ivyo wihanikirije: Uhoraho, ntuntētereze.

³²Nzogenda niruka mu nzira y’amabgirizwa yawe Ah’ uzokwagurira umutima wanje.

³³Uhoraho, ndangira inzira y’ ivyo washinze: Nanje nzoyitondera gushitsa kw iherezo.

³⁴Umpe gutahura, nanje nzokwitondera ivyagezwe vyawe, Mbere nzovyitondera n’umutima wose.

³⁵Uncishe mu nzira y’amabgirizwa yawe, Kukw ari yo ampimbara.

³⁶Uhindurire umutima wanje ku vyo wihanikirije, Ariko si ku nyungu mbi.

³⁷Ukebukishe amaso yanje, noye kurāba ibitagira ikimazi; Ungirire muzima mu nzira zawe.

³⁸Ushimangirire umusavyi wawe ijambo ryawe Ryasezeraniwe abakwubaha.

³⁹Unkūrekw agakēngērwe nama ntinya, Kukw imanza zawe ari nziza.

⁴⁰Nahahamiye amateka washinze: Ungire muzima kubg’ ukugororoka kwaw

⁴¹Imbabazi zawe ni zinshikeko, Uhoraho we, Ni zo gakiza kawe, nk’ukw ijambo ryawe rivuga.

⁴²Ni ho nzobona ico nishura ūntutse, Kuko nizigira ijambo ryawe.

⁴³Kandi ntukūre rwose ijambo ry’ukuri mu kanwa kanje: Kuko namye nizigira imanza zawe.

⁴⁴Na ntaryo nzokwama nitondera ivyagezwe vyawe, Ibihe bitazoshira.

⁴⁵Kandi nzogendana umwidegemvyo, Kuko nama ndondera amateka washinze.

⁴⁶Nzovugira imbere y’abami ivyo wihanikirije, Simmāramāre.

⁴⁷Kandi nzohimbarwa n’amabgirizwa yawe, Kukw ari yo nkunda.

⁴⁸Nzotarikira amaboko amabgirizwa yawe, kukw ari yo nkunda; Kandi nzokwiyumvira ivyo washinze.

⁴⁹Wibuke ijambo wasezeraniye umusavyi wawe, Kuko wanyijigije.

⁵⁰Iki ni co kimmara umubabaro mu marushwa yanje, N’ukw ijambo ryawe ryangize muzima.

⁵¹Abibone bantwengera cane mw ijigo, Ariko simpuba ngo mve mu vyagezwe vyawe.

⁵²Uhoraho, mpora nibuka imanza zawe za kera, Nkiremesha.

⁵³Ubushangashirwe buramfashe, Mbutewe n’abanyakibi bareka ivyagezwe vyawe.

⁵⁴Ivyo washinze vyambereye indirimbo Mu nzu y’uburāro bganje.

⁵⁵Uhoraho, nama nibuka izina ryawe mw ijoro, Nkitondera ivyagezwe vyawe.

⁵⁶Iki ni co nahawe, N’ukwitondera amateka washinze.

⁵⁷Uhoraho ni we mugabane wanje: Navuze yuko nzokwitondera amajambo yawe.

⁵⁸Ngukomeshereje ibobo umutima wanje wose kugira ng’ untunge: Ungirire ikigongwe, nk’ukw ijambo ryawe rivuga.

⁵⁹Ndiyumvira inzira zanje, Ngahindurira ibirenge vyanje ku vyo wihanikirije,

⁶⁰Nkanyaruka, sintebe Kwitondera amabgirizwa yawe.

⁶¹Imigozi y’abanyakibi yanyizingiriyeko, Ariko sinibagiye ivyagezwe vyawe.

⁶²Mu gicugu nama mvyuka kugira ngo ngushimire Imanza zawe zigororotse.

⁶³Ngendana n’abakwubaha bose, N’abitondera amateka washinze.

⁶⁴Uhoraho, isi yuzuye imbabazi zawe: N’unyigishe ivyo washinze.

⁶⁵Uhoraho, wagiriye neza umusavyi wawe, Nk’ukw ijambo ryawe rivuga.

⁶⁶N’unyigishe guhitamwo neza no kumenya ubgenge; Kuko nizeye amabgirizwa yawe.

⁶⁷Ntarababazwa narazimira; Ariko noneho nitondera ijambo ryawe.

⁶⁸Uri mwiza, kand’ ugira neza; Unyigishe ivyo washinze.

⁶⁹Abibone bandemeye ikinyoma, Ariko jeho nzokwitondera amateka washinze n’umutima wanje wose.

⁷⁰Imitima yabo iyagayaga nk’ ibinure: Ariko jeho mpimbarwa n’ ivyagezwe vyawe.

⁷¹Kubabazwa kwangiriye ikimazi, Kugira ngo nige ivyo washinze.

⁷²Ivyagezwe vyo mu kanwa kawe vyambereye Agasumbajana k’amafeza n’ amazahabu.

⁷³Intoke zawe ni zo zandemye, ni zo zambumvye: Umpe ubgenge kugira ngo nige amabgirizwa yawe.

⁷⁴Abakwubaha bazondāba banezerwe; Kuko nizigiye ijambo ryawe.

⁷⁵Uhoraho, ndazi yukw imanza zawe ar’ izigororotse, Kandi yuko kuba umunyakuri ari kwo kwaguteye kumbabaza.

⁷⁶Ndakwinginze, imbabazi zawe zimmare umubabaro, Nk’ukw ijambo ryawe riri wasezeraniye umusavyi wawe.

⁷⁷Kugira neza kwawe kunshikeko, kugira ngo mbeho: Kukw ivyagezwe vyawe ari vyo munezero wanje.

⁷⁸Abībone ni bamāramāre, kuko bandementanirije ibinyoma: Ariko jeho nzokwiyumvira amateka washinze.

⁷⁹Abakwubaha bampindukirire, Kugira ngo bamenye ivyo wihanikirije.

⁸⁰Umutima wanje utungane mu vyo washinze, Noye kuzomāramāra.

⁸¹Umutima wanje udendebuwe no kwifuza agakiza kawe: Ariko nizigira ijambo ryawe.

⁸²Amaso yanje akobowe no kwifuza ijambo ryawe, Nkibaza nti Mbeg’ uzommara umubabaro ryari?

⁸³Kuko mpindutse nk’umukuza w’urusato umanitswe ku mwotsi; Ariko sinibagira ivyo washinze.

⁸⁴Mbeg’ imisi y’ubugingo bg’ umusavyi wawe n’ingahe? Abampama uzobacirakw iteka ryari?

⁸⁵Abībone, badakurikira ivyagezwe vyawe, Banyimbiye ivyobo.

⁸⁶Amabgirizwa yawe yose n’ay’ ukwizigirwa: Bampamisha ibinyoma; n’ untabare.

⁸⁷Bari bashigaje gatoya bakandandura mw isi: Ariko sinareka amateka washinze.

⁸⁸Ungire muzima, nk’ukw imbabazi zawe ziri, Kugira ngo nitondere ivyo akanwa kawe kihanikirije.

⁸⁹Ijambo ryawe ryama rihamye mw ijuru Gushitsa ibihe bidashira, Uhoraho.

⁹⁰Ukwizigirwa kwawe kwamaho gushitsa ibihe vyose; Washinze isi, igumaho.

⁹¹Imanza zawe ni zo zituma uyu musi vyose biriho: Kuko vyose ar’ abasavyi bawe.

⁹²Iyaba ivyagezwe vyawe atari vyo munezero wanje Ico gihe mba nararandukiye mu marushwa yanje.

⁹³Sinzokwigera nibagira amateka washinze, Kukw ari yo wangirishije muzima.

⁹⁴Nd’ uwawe, nkiza; Kuko nama ndondera amateka washinze.

⁹⁵Abanyakibi banderekeye kundandura: Ariko jeho nzoshira umutima ku vyo wihanikirije.

⁹⁶Nabonye yuk’ uguhingurwa kwose gufise aho kugarukira; Arikw amabgirizwa yawe arāgutse cane.

⁹⁷Ewe kuntu nkunda ivyagezwe vyawe! Ni vyo ndimbūra bukarinda bgīra.

⁹⁸Amabgirizwa yawe atuma ndusha abansi banje ubgenge; Kuko na ntaryo yamana nanje.

⁹⁹Mfise ubgenge buruta ubg’ abigisha banje bose; Kukw ivyo wihanikirije ari vyo ndimbūra.

¹⁰⁰Ndusha abatāma ubgenge, Kuko nitondeye amateka washinze.

¹⁰¹Nabujije ibirenge vyanje inzira mbi yose, Kugira ngo nitondere ijambo ryawe.

¹⁰²Sinzotirimuka mu manza zawe ziroranye, Kukw ari wewe wanyigishije.

¹⁰³Ewe kuntu amajambo yawe angēngēra mu māgāge! Arusha ubūki gusōsa mu kanwa kanje.

¹⁰⁴Amateka washinze ni yo andonkesha ubgenge, Ni co gituma nanka inzira z’ibinyoma zose.

¹⁰⁵Ijambo ryawe n’itara rimurikira ibirenge vyanje, N’umuco umurikira mu nzira yanje.

¹⁰⁶Nararahiye ndarengwa Yuko nzokwitondera imanza zawe zigororotse.

¹⁰⁷Ndababazwa cane: Uhoraho, ungire muzima, nk’ukw ijambo ryawe ryavuze.

¹⁰⁸Uhoraho ndakwinginze, wemere amashikanwa y’akanwa kanje azanywe n’ urukundo, Kand’ unyigishe imanza zawe ziroranye.

¹⁰⁹Ubugingo bganje buri ku maregerege imisi yose, Ariko sinibagira ivyagezwe vyawe.

¹¹⁰Abanyakibi banteze umutego; Ariko sinahushije ngo mve mu mateka washinze.

¹¹¹Ivyo wihanikirije navyākiriye ngo bibe umwandu wanje w’ibihe bidashira, Kukw ari vyo kanyamuneza k’umutima wanje.

¹¹²Nshize umutima wanje ku gushitsa ivyo washinze Ibihe vyose, gushitsa no kw iherezo.

¹¹³Nanka ab’ imitima ibiri; Arikw ivyagezwe vyawe ndabikunda.

¹¹⁴Ni wewe bgihisho bganje n’inkinzo yanje, Nizigira ijambo ryawe.

¹¹⁵Mva i ruhande, mwa nkozi z’ibibi mwe, Kugira ngo nitondere amabgirizwa y’Imana yanje.

¹¹⁶Umbere ubgishimikizo, nk’ ukw ijambo ryawe ryavuze, kugira ngo mbeho, Noye kuzotēterezwa n’ivyizigiro vyanje.

¹¹⁷Undamire, nzoba ndarusimvye, Nze name ntumbera ivyo washinze.

¹¹⁸Wakēngereye abahushagirika bose bakava mu vyo washinze: Kuk’ ubugunge bgabo ata co bubamariye.

¹¹⁹Ukūrah’ abanyakibi bose bo mw isi nk’inkamba ku cuma: Ni co gituma nkunda ivyo wihanikirije.

¹²⁰Umubiri wanje uhindishwa agashitsi no kugutinya; Kandi ntinya imanza zawe.

¹²¹Nakoze ibigororotse n’ibiroranye: Ntundekerane abampahaza.

¹²²Wishinge k’uzogirira neza umusavyi wawe: Abībone ntibaze bampahaze.

¹²³Amaso yanje akobowe no kwifuza agakiza kawe, N’ijambo ryawe rigororotse.

¹²⁴Ugirire umusavyi wawe ibihwanye n’imbabazi zawe, Kand’ unyigishe ivyo washinze.

¹²⁵Nd’ umusavyi wawe: umpe ubgenge, Kugira ngo mmenye ivyo wihanikirije.

¹²⁶Harageze k’Uhoraho agira ico akora, Kuko bahinduye ubusa ivyagezwe vyiwe.

¹²⁷Ni co gituma nkunda amabgirizwa yawe, Nkayarutisha izahabu, mbere naho yoba izahabu iramuye.

¹²⁸Ni co gituma niyumvira yukw amateka washinze yose atunganye; Kandi nanka inzira yose y’ibinyoma.

¹²⁹Ivyo wihanikirije n’ibitangaza: Ni co gituma umutima wanje uvyitondera.

¹³⁰Guhishurirwa amajambo yawe kuzana umuco, Guha abatungu ubgenge.

¹³¹Nāsamitse akanwa, ndahuzagizwa, Kuko nifuza amabgirizwa yawe.

¹³²Unkebuke, ungirire ikigongwe, Nk’uk’ umenyereye kukigirira abakunda izina ryawe.

¹³³Gumiriza intambuko zanje mw ijambo ryawe; Ntihagire ikigabitanyo na kimwe kinganza.

¹³⁴Uncungure, unkūre mu gahahazo k’abantu, Kugira ngo nitondere amateka washinze.

¹³⁵Umurikishirize umusavyi wawe mu nyonga hawe: Unyigishe ivyo washinze.

¹³⁶Amaso yanje asendanisha inzūzi z’amazi, Kuko batitondera ivyagezwe vyawe.

¹³⁷Ur’ umugororotsi, Uhoraho we, Imanza zawe ziragororotse.

¹³⁸Ivyo wihanikirije wabigeresheje ukugororoka N’ukwizigirwa kw’ukuri.

¹³⁹Ishaka ryanje rirandanduye Kukw abarwanizi banje bibagiye amajambo yawe.

¹⁴⁰Ijambo ryawe n’icuma kiramuye; Ni co gituma umusavyi wawe arikunda.

¹⁴¹Nd’ uwo hasi, ndagayitse, Ariko sinibagira amateka washinze.

¹⁴²Ukugororoka kwawe n’ukugororoka kw’ibihe bidashira: Ivyagezwe vyawe n’ukuri.

¹⁴³Amarushwa n’intuntu biranshitseko: Yamara, amabgirizwa yawe ni yo munezero wanje.

¹⁴⁴Ivyo wihanikirije n’ivyo kugororoka ibihe bidashira: Umpe ubgenge mbone kubaho.

¹⁴⁵Ntakambishije umutima wose; unyishure Uhoraho we: Nzokwitondera ivyo washinze.

¹⁴⁶Ndagutakambiye, nkiza, Kugira ngo nitondere ivyo wihanikirije.

¹⁴⁷Umutwenzi utaratambika naratakamvye: Amajambo yawe ni yo nizigiye.

¹⁴⁸Abateramyi batarakūranwa mu bishingo vyabo mba ndi maso, Kugira ngo ndimbūre ijambo ryawe.

¹⁴⁹Ni wumve ijwi ryanje, ukw imbabazi zawe zingana: Ungire muzima, Uhoraho we, nk’ukw imanza zawe zashinze.

¹⁵⁰Abōmekanye n’ukugabitanya barēgereje, Ariko bari kure y’ivyagezwe vyawe.

¹⁵¹Wewe Uhoraho, uri hafi: Amabgirizwa yawe yose n’ ay’ ukuri.

¹⁵²Uhereye kera namenyeshejwe n’ivyo wihanikirije Yuko washizeh’ itanguriro ryavyo kugeza ibihe bidashira.

¹⁵³Shira umutima ku marushwa yanje, undokore; Kuko ntibagira ivyagezwe vyawe.

¹⁵⁴Umbūranire, uncungure: Ungire muzima, nk’ukw ijambo ryawe ryavuze.

¹⁵⁵Agakiza kari kure y’abanyakibi, Kuko batarondera ivyo washinze.

¹⁵⁶Uhoraho, imbabazi zawe zirakomeye, Ungire muzima, nk’ukw imanza zawe zashinze.

¹⁵⁷Abampīga n’abandwanya ni benshi, Ariko simpuba ngo mve mu vyo wihanikirije.

¹⁵⁸Nabonye abava mw isezerano, ndashavura: Kuko batitondera ijambo ryawe.

¹⁵⁹Rāba ingene nkunda amateka washinze: Uhoraho, ungire muzima, nk’ukw imbabazi zawe ziri.

¹⁶⁰Ijambo ryawe ryose ripoperanirijwe mu kuri; Imanza zawe zigororotse iyo ziva zikagera zamah’ ibihe bidashira.

¹⁶¹Abahambaye bampamiye ubusa; Arik’ umutima wanje wubaha amajambo yawe.

¹⁶²Nnezererwa ijambo ryawe Nk’ūronse inyagano nyinshi.

¹⁶³Nanka ibinyoma, mvyanka urunuka: Arikw ivyagezwe vyawe ndabikunda.

¹⁶⁴Uko bukeye ngushima ibihetangabo ndwi, Ngushimira imanza zawe zigororotse.

¹⁶⁵Abakunda ivyagezwe vyawe bagira amahoro menshi; Nta kibatsitaza bafise.

¹⁶⁶Uhoraho, ndishimiye agakiza kawe, Kandi nkora ivyo amabgirizwa yawe avuga.

¹⁶⁷Umutima wanje witondeye ivyo wihanikirije, Kandi ndabikunda bihebuje.

¹⁶⁸Nitondeye amateka washinze n’ivyo wihanikirije: Kukw inzira zanje zose zir’ imbere yawe.

¹⁶⁹Uhoraho, ugutakamba kwanje ni kwīgire hafi imbere yawe; Umpe ubgenge, nk’ukw ijambo ryawe ryavuze.

¹⁷⁰Ukwinginga kwanje ni gushike imbere yawe; Undokore, nk’ukw ijambo ryawe ryavuze.

¹⁷¹Iminwa yanje ivuge ishimwe, Kuk’ unyigisha ivyo washinze.

¹⁷²Ururimi rwanje ni ruririmbe ijambo ryawe, Kukw amabgirizwa yawe yose ar’ ay’ ukugororoka.

¹⁷³Ukuboko kwawe kwame kugabirije kuntabara, Kuko natoranije amateka washinze.

¹⁷⁴Uhoraho, nifuje agakiza kawe, Kand’ ivyagezwe vyawe ni vyo bimpimbara.

¹⁷⁵Ubugingo bganje ni bubeho, kugira ngo bugushime: Imanza zawe zintabare.

¹⁷⁶Narahuvye nk’intama izimiye: rondera umusavyi wawe, Kuko ntibagira amabgirizwa yawe.