Read Bibliya Yera 1951 Zaburi 135 Bible Online

Zaburi 135 - Bibliya Yera 1951 bible

Zaburi 135

¹Haleluya! Ni mushime izina ry’ Uhoraho; Ni mumushime, yemwe basavyi b’Uhoraho,

²Mwebge abahagarara mu ngoro y’Uhoraho, Mu nyubakwa z’ingoro y’ Imana yacu.

³Mushimire Uhoraho yukw ari mwiza; Muririmbire izina ryiwe ishimwe, kukw ar’ iry’ igikundiro.

⁴Kuk’ Uhoraho yitoranirije Yakobo, Isirayeli yamutoranirije kuba uwiwe bgite.

⁵Kuko nzi yuk’ Uhoraho ahambaye, Kandi yuk’ Umwami wacu asumba ibigirwamana vyose.

⁶Igihimbaye Uhoraho cose ni co akora, Mw ijuru no mw isi, mu kiyaga n’i bgina hose.

⁷Arandisha ibipfungu bikava ku mpera y’isi; Imvura ayiremera imiravyo; Asokorora umuyaga mu bushinguro bgiwe.

⁸Ni we yakubise abana b’ imfura bo muri Egiputa, arabica, Imfura z’abantu bo n’uburiza bg’ibitungano.

⁹Yarungitse ibimenyetso n’ibitangaza hagati yawe, Egiputa, Kuri Farawo no ku basavyi biwe bose.

¹⁰Ni we yariritse amahanga menshi, Yica abami bahambaye:

¹¹Sihoni, umwami w’Abamori, Na Ogi, umwami w’i Bashani, N’abami b’ibihugu vy’i Kanani bose;

¹²Agaba ibihugu vyabo ngo bibe umwandu, Umwandu w’Abisirayeli abantu biwe.

¹³Izina ryawe, Uhoraho, ryamah’ ibihe bidashira, Ewe Uhoraho, icibutso cawe kizohorah’ ibihe vyose.

¹⁴Kuk’ Uhoraho azocira urubanza abantu biwe, Kand’ azokwirimbūra ku vyo agirira abasavyi biwe.

¹⁵Ibigirwamana vy’abanyamahanga n’ifeza n’izahabu, N’ibikorwa n’amaboko y’abantu.

¹⁶Bifise akanwa, ntibivuga, Bifise amaso, ntibibona,

¹⁷Bifise amatwi, ntivyumva, Kandi nta mpwemu ziri mu kanwa kavyo.

¹⁸Ababikora bazohwana na vyo, Mbere n’ūvyizigira wese.

¹⁹Yemwe ab’ inzu ya Isirayeli, mushemagize Uhoraho: Yemwe ab’ inzu ya Aroni, mushemagize Uhoraho:

²⁰Yemwe ab’ inzu ya Lewi, mushemagize Uhoraho: Yemwe abubaha Uhoraho, mumushemagize!

²¹Bashemagirize Uhoraho i Siyoni, Ni we aba i Yerusalemu. Haleluya!