Read Bibliya Yera 1951 Zaburi 143 Bible Online

Zaburi 143 - Bibliya Yera 1951 bible

Zaburi 143

¹Zaburi ya Dawidi. Uhoraho we, ni wumve ugusenga kwanje; tega ugutwi ukwinginga kwanje! Unyishure, kubgo kuba umwizigirwa kwawe, no kubgo kugororoka kwawe.

²Kandi ntushire umusavyi wawe mu rukinja, Kukw ata wo mu bariho azotsindira mu nyonga zawe.

³Kuk’ umwansi yahize umutima wanje; Akantsinda hasi akansiribanga; Yatumye ngerēra ahantu h’ umwiza nk’abāpfuye kera.

⁴Ni co gitumye umushaha wanje undendebukiramwo, Umutima wanje ukūmirirwa muri jewe.

⁵Nibutse imisi ya kera; Ndimbūra ivyo wakoze vyose: Ngereranya igikorwa c’amaboko yawe.

⁶Nkwayira amaboko; Umushaha wanje ukugirira inyota nk’iy’ igihugu cūmāniwe. Sela .

⁷Uhoraho, n’utebuke unyishure; umutima wanje urashiringitira; Ntumpishe mu nyonga hawe; Simmere nk’abamanuka baja muri rwa rwobo.

⁸Mu gitondo unyumvishe imbabazi zawe, Kukw ari wewe nizigira: Ummenyeshe inzira nkwiye gucamwo, Kukw ari wewe ncurūrira umutima.

⁹Uhoraho, nkiza abansi banje: Ni wewe mpungiyeko ng’ umpishe.

¹⁰Unyigishe gukora ivyo ugomba, kukw ari wewe Mana yanje: Mpwemu wawe mwiza andōngōre mu nzira irashe.

¹¹Uhoraho, ungire muzima, kubg’ izina ryawe: Ukūre umutima wanje mu vyago kubg’ ukugororoka kwawe.

¹²Kand’ urandure abansi banje kubg’ imbabazi zawe. Uhonnye abababaza umushaha wanje bose; Kuko nd’ umusavyi wawe.