Read Bibliya Yera 1951 Zaburi 144 Bible Online

Zaburi 144 - Bibliya Yera 1951 bible

Zaburi 144

¹Zaburi ya Dawidi. Uhoraho, igitandara canje, n’ashemagizwe, Yigisha amaboko yanje kurasana, N’intoke zanje kurwana:

²Ni we ndonkeramw’ imbabazi, kandi ni we gihome kinkīngira, Ni we munara wanje muremure, n’umurokozi wanje; Ni we nkinzo yanje n’uwo nizigira; Ni we angandurira abantu banje ngo ndabaganze.

³Uhoraho, umuntu n’iki ah’ umumenya? Cank’ umwana w’umuntu ah’ umwiyumvira?

⁴Umuntu ameze nk’impwemu zihumetswe gusa: Imisi yiwe imeze nk’igitūtu gishira.

⁵Andāza ijuru ryawe, Uhoraho we, nawe wimanukire: Ukore ku misozi, ifumbe umwotsi.

⁶Uravye imiravyo, ubashwiragize; Urase imyampi yawe, ubace ivutu.

⁷Rāmvura ukuboko kwawe uri hejuru, Undohōre, undokore mu mazi menshi, Unkize ukuboko kw’abanyamahanga.

⁸Akanwa kabo kavuga ivyo kubesha, N’ukuboko kwabo kw’i buryo n’ukunyabinyoma.

⁹Mana, ndakuririmbira indirimbo nsha: Ndakuririmbira ishimwe ku nanga y’imirya cumi.

¹⁰Ni wewe uha abami agakiza: Kiza Dawidi umusavyi wawe inkota yica.

¹¹Ndokora, unkūre mu maboko y’abanyamahanga, Akanwa kabo kavuga ivyo kubesha, N’ukuboko kwabo kw’i buryo n’ukunyabinyoma.

¹²Abahungu bacu ni babe nk’ibiti vy’ibitontomya mu kwaruka kwabo, N’abakobga bacu bamere nk’ inkingi zihinguwe nk’uko bashariza ingoro;

¹³Ngw ibigega vyacu vyuzure, birimw’ ivyimburwa vy’ imyuga yose; Intama zacu zivyarire ibihumbi n’ibihumbi mu vyanya vyacu;

¹⁴Ngw inka zacu zidibirize; Ngo hoye kugira abamena, cank’ abasohoka kurwana; Kandi mu mihōra yacu hoye kuvuga induru.

¹⁵Hahirwa ihanga rimererwa rirtyo: Hahirwa ihanga rifise Uhoraho kw Imana yaryo.