Read Bibliya Yera 1951 Zaburi 145 Bible Online

Zaburi 145 - Bibliya Yera 1951 bible

Zaburi 145

¹Zaburi yo gushima: n’iya Dawidi. Mana yanje, Mwami wanje, ndagushira hejuru; Nzoshemagiza izina ryawe ibihe bitazoshira.

²Nzokwama ngushemagiza uko bukeye, Nzoshima izina ryawe ibihe bitazoshira.

³Uhoraho arahambaye, abereye gushimwa cane: Ubukuru bgiwe ntibushobora guserangurika.

⁴Ab’ urunganwe rumwe bazoshimira ab’ urundi ibikorwa vyawe, Babīgānire ivy’ inkomezi wakoze.

⁵Nzovuga ubgiza bg’igitinyiro c’icubahiro cawe, Nzoririmba ibikorwa bitangaje wakoze.

⁶Abantu bazovuga inkomezi z’ ibikorwa vyawe biteye ubgoba: Nanje nzomenyekanisha ubukuru bgawe.

⁷Bazokwibukiriza ukugira neza kwawe kwinshi, Baririmbe ukugororoka kwawe.

⁸Uhoraho n’umunyabuntu, yuzuye imbabazi, Ateba kuraka, agira ikigongwe cinshi.

⁹Uhoraho agirira neza bose, Imbabazi ziwe ziri ku vyo yaremye vyose.

¹⁰Uhoraho, ivyo waremye vyose bizogushima: Abakunzi bawe bazogushemagiza.

¹¹Bazovuga ubgiza bg’ubgami bgawe, Bandagaze ububasha bgawe,

¹²Kugira ngo bamenyeshe abana b’abantu ivy’ inkomezi wakoze, N’ubgiza bg’igitinyiro c’ ubgami bgawe.

¹³Ubgami bgawe n’ubgami bg’ ibihe bidashira, Ubugabe bgawe buzohangama uk’ urunganwe ruzogenda rukurikira urundi.

¹⁴Uhoraho aramira abatemba bose, Yēmesha abahetamye bose.

¹⁵Vyose biguhanga amaso, Nawe ukabigaburira ivyo kurya vyavyo igihe kigeze.

¹⁶Upfumbaturura igipfunsi cawe, Ugahāza ukwifuza kw’ibiriho vyose.

¹⁷Uhoraho agororoka mu nzira ziwe zose, N’umunyabuntu mu bikorwa vyiwe vyose.

¹⁸Uhoraho aba hafi y’abamwambaza bose, Y’abamwambaza mu vy’ukuri bose.

¹⁹Azoshitsa ivyo abamwubaha bagomba; Kand’ azokwumva ugutakamba kwabo, abakize.

²⁰Uhoraho azigama abamukunda bose; Arikw abanyakibi bose azobahonnya.

²¹Akanwa kanje kazovuga ishimwe ry’Uhoraho; Abafise imibiri bose ni bashemagize izina ryiwe ryera ibihe bitazoshira.