Read Bibliya Yera 1951 Zaburi 18 Bible Online

Zaburi 18 - Bibliya Yera 1951 bible

Zaburi 18

¹Iyi Zaburi yahawe umukuru w’abaririmvyi. N’iya Dawidi umusavyi w’Uhoraho, yabariye Uhoraho amajambo yo mur’ iyi ndirimbo, umusi Uhoraho yamurokoye, akamukūra mu maboko y’abansi biwe bose, no mu ya Sauli, ati Ndagukunda, Uhoraho we, ni wewe nkomezi zanje.

² Uhoraho n’igitandara canje, n’ubuhungiro bganje, n’ umurokozi wanje, N’Imana yanje, n’igitandara canje gikomeye, ni we nzohungirako; Ni we nkinzo yanje, n’ihembe ry’agakiza kanje, n’umunara wanje wo guhungiramwo.

³Ndambaza Uhoraho abereye gushimwa: Ni ho nzokizwa abansi banje.

⁴Ingoyi z’urupfu zaranyizingiriyeko, Isūri zo kurandura zanteye ubgoba.

⁵Ingoyi z’i kuzimu zantaye hagati, Imitego y’urupfu yantanze imbere.

⁶Mu mubabaro wanje nambaje Uhoraho, Natakambiye Imana yanje; Yumva ijwi ryanje iri mu ngoro yayo, Ivyo natakambiye imbere yayo biyishika mu matwi.

⁷Maz’ isi iratigita, ihinda agashitsi, Amatanguriro y’imisozi na yo aranyiganyiga, Atigitishwa n’uburake bgayo.

⁸Umwotsi upfunduka mu mazuru yayo, Umuriro uva mu kanwa kayo, urayigiza, Amakara afatishwa na wo.

⁹Yandaza ijuru, na yo nyene iramanuka, Umwiza w’umuzitanya wari musi y’ibirenge vyayo.

¹⁰Iguruka ivyagiye ku mukerubi,[3] Mber’ igurukishwa vuba n’ amababa y’umuyaga.

¹¹Umwiza iwugira ubgihisho, kuba ihema ryayo riyisāgiriye; Isāgīrwa n’umwiza w’ibicu bibungenze amazi, ibicu bitwaye intunda vyo mw ijuru.

¹²Ubgiza bukayangana bur’ imbere yayo butuma ibicu vyayo bitwaye intunda bikinjura, Hakaba urubura n’amakara yaka.

¹³Kand’ Uhoraho aturagarira mw ijuru, Ūsumba vyose avugisha ijwi ryiwe, Hakaba urubura n’amakara yaka.

¹⁴Arasa imyampi yiwe, ashwiragiza abansi banje, Arekura imiravyo myinshi, abaca umuhongo.

¹⁵Maz’ agataka ko musi y’amazi karaboneka, Amatanguriro y’isi aratwikururwa, Bitewe n’uguhana kwawe, Uhoraho, N’ugufūha kw’impwemu ziva mu mazuru yawe.

¹⁶Atuma ukuboko ari hejuru, aramfata, Andoba mu mazi menshi.

¹⁷Ankiza umwansi wanje akomeye, N’abanyanka, kuko bandusha inkomezi.

¹⁸Bari bantanze imbere ku musi w’amagorwa yanje, Arik’ Uhoraho ni we yambereye ubgishimikizo.

¹⁹Ayankūramwo, anshira ahantu hāgutse: Yandokoye kuko namuhimbaye.

²⁰Uhoraho yangereye ibikwiranye n’ukugororoka kwanje, Nk’ukw amaboko yanje atanduye, ni ko yangiriye.

²¹Kuko nitondeye inzira z’ Uhoraho, Kandi sinakoze icaha co kureka Imana yanje:

²²Kukw amateka yayo yose yar’ imbere yanje, Kand’ ivyagezwe vyayo sinabikūye imbere yanje.

²³Kandi nabana na yo ntungana, Nirinze ukugabitanya kwanje.

²⁴Ni co catumye Uhoraho anyishura ibikwiranye n’ukugororoka kwanje, Ibikwiranye n’ukutandura kw’ amaboko yanje mu nyonga ziwe.

²⁵Ku munyembabazi uzokwiyerekana ur’ umunyembabazi; K’ūtunganye uzokwiyerekana ur’ ūtunganye;

²⁶K’ūtanduye uzokwiyerekana ur’ ūtanduye; Ku ntabarirwa uzokwiyerekana ur’ ūdadika.

²⁷Kuk’ uzokiza abacishijwe bugufi, Arikw amaso yibona uzoyasubiza hasi.

²⁸Ni wewe uzodomeka itara ryanje, Uhoraho, Imana yanje, ni we yākira umwiza wanje.

²⁹Kukw ari wewe unshoboza gutera umuce w’ingabo, Kand’ ar’ Imana yanje inshoboza gusimba uruzitiro rw’ amabuye.

³⁰Imana yo, inzira yayo iratunganye rwose, Ijambo ry’Uhoraho ryaravugutiwe: Ni we nkinzo ikīngira abamuhungirako bose.

³¹Ni nde Mana, atar’ Uhoraho? Ni nde Gitandara, atar’ Imana yacu?

³²Ni yo Mana inkenyeje inkomezi, Igatunganya inzira yanje.

³³Ni yo ihindura ibirenge vyanje nk’ivy’ impongokazi, Impagarika ku dutwe tw’imisozi yanje.

³⁴Yigisha intoke zanje kurasana, Bituma amaboko yanje afora umuheto w’umuringa.

³⁵Kandi wampaye inkinzo, ni yo gakiza kawe, Ukuboko kwawe kw’i buryo kurandamira, Ukwicisha bugufi kwawe kwanshize hejuru.

³⁶Intambuko zanje wazāguriye inzira, Ibirenge vyanje ntivyanyereye.

³⁷Nakinagije abansi banje, ndabahamvya, Sinatabaruka badaheze.

³⁸Narabatobekeranije, ntibabasha kuvyuka, Kandi bāguye musi y’ibirenge vyanje.

³⁹Wankenyeje inkomezi ngo ndwane, Abarwanizi banje wabamaze igabo.

⁴⁰Watumye ababisha banje bampa ibitugu, Kugira ngo ndandure abanyanka.

⁴¹Baratakamvye, ntihagira ūbakiza; Batakambiye Uhoraho, ntiyabishura.

⁴²Maze ndabasya, bacika nk’ umukungugu utumurwa n’ umuyaga, Mbata nk’umwavu ku nzira.

⁴³Wankijije indwano z’abantu, Wangize ūganza amahanga, Ihanga ntigeze kumenya ryaransavye.

⁴⁴Bumvise inkuru yanje baca baranyoboka, Abanyamahanga baje banyunamira bampema.

⁴⁵Abanyamahanga barakabiranye, Bava mu binyegero vyabo bahinda agashitsi.

⁴⁶Uhoraho yamaho; Igitandara canje gihimbazwe; Imana y’agakiza kanje ishirwe hejuru:

⁴⁷Ni yo Mana impōra, Ikangandūrira amahanga nkayaganza.

⁴⁸Inkiza ababisha banje: Mber’ unshira hejuru y’abampagurukira, Unkiza n’umuntu w’ikirara.

⁴⁹Ni co gituma, Uhoraho, nzogushimira mu mahanga, Ndirimbe ishimwe ry’izina ryawe.

⁵⁰Umwami yimitse amugabira agakiza gakomeye, Agirira imbabazi umwami yimikishije amavuta, Ni Dawidi n’uruvyaro rwiwe ibihe bidashira.