Read Bibliya Yera 1951 Zaburi 2 Bible Online

Zaburi 2 - Bibliya Yera 1951 bible

Zaburi 2

¹ Abanyamahanga n’iki kibateye umuvurungano? N’amoko yagīriye ingingo iki ivy’ ubusa?

²Abami bo mw isi baragomoye, N’abakuru bahūrije ingingo hamwe Kurwanya Uhoraho n’Uwo yarobanuje amavuta;

³Bati Ngo ducagagure imvuto bātubohesheje, Dute kure ingoyi bādushizemwo.

⁴Umwe avyagiye mw ijuru azobatwengera mw ijigo: Umwami Imana azobakēngēra.

⁵Maz’ azobabarirana uburake bgiwe, Azobatēza ubgoba uguhambara kwiwe gukomeye,

⁶Ati Ni jewe niyimikiye umwami wanje Kuri Siyoni, umurwa wanje wera.

⁷Ndavuga rya jambo rishinzwe: Uhoraho yarambgiye, at’ Ur’ Ubura bganje, Uyu musi ndakuvyaye.

⁸Nsaba, nzoguha amahanga, az’ abe umwandu wawe, N’impera z’isi zize zibe ishamvu yawe.

⁹Uzobavunaguza inkoni y’icuma, Uzobamenagura nk’ikibumbano.

¹⁰Noneho rero, mwa bami, ni muce ubgenge, Mwa bacamanza bo mw isi, ni mwemere kugīrwa inama.

¹¹Musabe Uhoraho mwubashe, Munezeranwe guhinda agashitsi.

¹²Mugumbire urya Mwana, kugira ngo ntarake, namwe mugahonera mu nzira, Kuk’ uburake bgiwe bgoca buziriringa: Hahirwa abamuhungirako bose.