Read Bibliya Yera 1951 Zaburi 21 Bible Online

Zaburi 21 - Bibliya Yera 1951 bible

Zaburi 21

¹Iyi Zaburi yahawe umukuru w’abaririmvyi. N’iya Dawidi. Uhoraho we! Umwami azonezerezwa n’inkomezi zawe. Ereg’ agakiza kawe azokanezererwa cane!

²Wamuhaye ico umutima wiwe wifuza, Ntiwamwimye ico iminwa yiwe yasavye. Sela .

³Kuk’ umusanganije imigisha y’ivyiza, Wamwambitse igitsibo c’izahabu nziza mu mutwe.

⁴Yagusavye ubugingo, urabumuha, Ni bgo kuramba ibihe bitazoshira.

⁵Ubgiza bgiwe ni bginshi kubg’ agakiza kawe, Icubahiro n’igitinyiro ubimushizeko.

⁶Umugize icitegererezo c’ihirwe ibihe vyose, Umunejereje akaneza mu nyonga zawe.

⁷Kuk’ umwami yizigira Uhoraho, Kubg’ imbabazi z’Ūsumba vyose ntazosegenyeshwa.

⁸Ukuboko kwawe kuzoserangura ababisha bawe bose; Ukuboko kwawe kw’i buryo kuzoserangura abakwanka.

⁹Uzobahindura nk’itanure ry’ umuriro mu gihe c’uburake bgawe, Uhoraho azobayongobeza mu burake bgiwe, Umuriro uzobatsontsomera.

¹⁰Nawe uzohonnya imbuto zabo mw isi, N’uruvyaro rwabo mu bana b’abantu.

¹¹Kuko bagabiye kukugirira nabi, Bagīye inama badashobora gushitsa.

¹²Uzotuma bagutera ibitugu, Uzoshira mu ruge rwawe utumbereje mu maso habo.

¹³Uhoraho, ni wishire hejuru mu nkomezi zawe: Ni ho tuzoririmba dushima ububasha bgawe.