Read Bibliya Yera 1951 Zaburi 22 Bible Online

Zaburi 22 - Bibliya Yera 1951 bible

Zaburi 22

¹Iyi Zaburi yahawe umukuru w’abaririmvyi: bavugira inanga mw ijwi ryitwa Impongokazi yubuwe mu gatondo. Ni Zaburi ya Dawidi. Mana yanje, Mana yanje, n’iki kikumpebesheje, Ukaba kure ntuntabare, kure y’amajambo yo kuniha kwanje?

²Mana yanje, ntakambira ku murango ntunyishure: Ntakambira no mw ijoro, simpore.

³Ariko wewe ur’ uwera, Intebe yawe ikikijwe n’ishimwe rya Isirayeli.

⁴Ba sogokuruza bacu bārakwizigira: Bārakwizigira, nawe ukabakiza.

⁵Bāragutakambira, bagakizwa: Bārakwizigira, ntibamāramāre.

⁶Ariko jeho nd’umusiba, sind’ umuntu: Ndi ruvumwa mu bantu, nkēngērwa na bose.

⁷Abambona bose bantwengera mw ijigo: Bampa ibinoko, banzunguriza imitwe,

⁸Bati Yishize k’Uhoraho, n’ amukize: N’amukize kw amunezererwa.

⁹Ariko ni wewe wankūye mu nda ya mama: Wanyijigije nkiri kw ibere rya mama.

¹⁰Ni wewe nashiburiweko, uhereye aho navukiye; Ni wewe Mana yanje uhereye aho naviriye mu nda ya mama.

¹¹Ntumbe kure, kukw amagorwa ari hafi, Kand’ ata mutabazi.

¹²Impfizi nyinshi zirankikije, Impfizi z’ubukombe z’i Bashani zintaye hagati.

¹³Baranyasamiye n’akanwa kabo, Nk’intambge yaromoye yivuga.

¹⁴Nsutswe nk’amazi, Amagufa yanje yose aradohotse, Umutima wanje umeze nk’ ishashara, Uyagiye hagati mu mara yanje.

¹⁵Intege zanje zumye nk’urujo, Ururimi rwanje rufatanye n’ uruhekenyero; Kand’ unshize mu mukungugu w’urupfu.

¹⁶Kukw imbga zinkikije, Umurwi w’inkozi z’ibibi wantaye hagati; Bantoboye ibiganza n’ibirenge.

¹⁷Nshobora guharūra amagufa yanje yose; Bandāba bankanuriye amaso.

¹⁸Bagabura impuzu zanje, Bapfindira umwambaro wanje.

¹⁹Ariko ntumbe kure, Uhoraho we: Yewe muvunyi wanje, tebuka untabare.

²⁰Kiza ubugingo bganje inkota, Ico mfitiye igishika ugikize ububasha bg’imbga.

²¹Nkiza akanwa k’intambge; Waranyishuye, unkūra mu mahembe y’imbogo.

²²Nzobarira bene Data izina ryawe, Nzogutazirira hagati y’ishengero.

²³Yemwe abubaha Uhoraho, mumutazire, Yemwe ruvyaro rwa Yakobo mwese, mumuhimbaze, Yemwe ruvyaro rwa Isirayeli mwese, mumutinye.

²⁴Kukw atāgaye cank’ atanse urunuka amarushwa y’umurushwa, Kand’ atāmuhishije mu nyonga hiwe: Arikw amutakambiye, yaramwumvise.

²⁵Ishimwe ngushimisha mw ikoraniro ryinshi riva kuri wewe: Nzoshitsa amasezerano nagusezeraniye imbere y’abakwubaha.

²⁶Abaciye bugufi bazorya bahāge, Abarondera Uhoraho bazomuhimbaza: Imitima yanyu irambe ibihe vyose.

²⁷Abo ku mpera zose z’isi bazokwibuka bahindukirire Uhoraho, Amoko yose yo mu mahanga azosengera imbere yawe.

²⁸Kuk’ ubgami ar’ ubg’ Uhoraho, Kand’ ari we mugabe w’amahanga.

²⁹Abakomeye bo mw isi bose bazorya basenge; Kand’ abamanuka baja mu mukungugu bazokwunama imbere yiwe, N’ūdashobora kwizigamira ubugingo bgiwe ngo ntibupfe.

³⁰Uruvyaro ruzomusaba; Abuzukuru bazovuka bazobarirwa ivy’ Umwami Imana.

³¹Bazoza babgire abantu bazovuka Ukugororoka kwiwe, kw ari we yabikoze.