Read Bibliya Yera 1951 Zaburi 26 Bible Online

Zaburi 26 - Bibliya Yera 1951 bible

Zaburi 26

¹Zaburi ya Dawidi. Uhoraho, uncire urubanza, kuk’ ukugororoka kwanje ari kwo ngenderamwo, Kandi nizigira Uhoraho ntakekeranya.

²Uhoraho, unsuzume, ungerageze, Sesa umushaha wanje n’umutima wanje.

³Kukw imbabazi zawe ziri mu maso yanje, Kandi ngendera mu kuri kwawe.

⁴Sinicarana n’abanyabinyoma, Kandi sinzogendera indyarya.

⁵Nanka ikoraniro ry’inkozi z’ ibibi, Kandi sinzokwicarana n’abanyakibi.

⁶Nzokaraba mu kudacumura, Ni ho nzobona gukikuza igicaniro cawe, Uhoraho;

⁷Kugira ngo numvikanishe ijwi ry’ishimwe, Mvuge ibikorwa bitangaje vyose wakoze.

⁸Uhoraho, nkunda ah’ inzu yawe igerereye, Ahantu ubgiza bgawe buba.

⁹Nturandurane umutima wanje n’abanyavyaha, Cank’ ubugingo bganje n’ abavisha amaraso.

¹⁰Amaboko yabo arimw’ umugararizo, Ukuboko kwabo kw’i buryo kwuzuye ingurire.

¹¹Ariko jeho ukugororoka kwanje ni kwo nzogenderamwo; Uncungure, ungirire ikigongwe.

¹²Ikirenge canje gihagaze aharinganiye; Nzoshemagiriza Uhoraho mu makoraniro.