Read Bibliya Yera 1951 Zaburi 27 Bible Online

Zaburi 27 - Bibliya Yera 1951 bible

Zaburi 27

¹Zaburi ya Dawidi. Uhoraho ni we muco wanje n’agakiza kanje: nzotinya nde? Uhoraho ni we gihome gikīngira ubugingo bganje, ni nde azonca ivutu?

²Hamwe inkozi z’ibibi zari zinziye ngo zirye inyama zanje, Ni bo barwanizi banje n’ababisha banje, bāratsitaye, baratemba.

³Nah’ ingabo zosagaza ngo zintere, Umutima wanje ntiwotinya; Nah’ intambara yovyuka ikandwanya, No muri yo norema.

⁴Ico nsaba Uhoraho ni kimwe, ni co nzohora nitwaririka: N’ukuba mu ngoro y’Uhoraho imisi yose y’ubugingo bganje, Nkarāba ubgiza bg’Uhoraho, nkihweza urusengero rwiwe.

⁵Kuko ku musi w’amagorwa azonzigama akampisha mw ihema ryiwe, Mu bgigobeko bgo mw ihema ryiwe ni ho azompisha; Azonshira hejuru, ampagarike ku gitandara.

⁶N’ubu, umutwe wanje uzoshirwa hejuru y’abansi banje bankikije; Nanje nzotangira ibimazi vy’ umunezero mw ihema ryiwe, Nzoririmba, ego cane nzoririmbira Uhoraho amatazirano.

⁷Uhoraho we, umve gutaka kw’ijwi ryanje, Utek’ ungirire ikigongwe, unyishure.

⁸Wavuze, uti Ni murondere mu nyonga hanje; umutima wanje urakwishuye, Uti Mu nyonga hawe ndaharondera, Uhoraho.

⁹Ntumpishe mu nyonga hawe, Ntiwirukanishe umusavyi wawe uburake. Ni wewe wahoze ur’ umutabazi wanje, Ntunte, ntumpebe, Mana y’ agakiza kanje.

¹⁰N’iyo data na mama bonta, Uhoraho azonyitorera.

¹¹Ndangira inzira yawe, Uhoraho, Undōngōre mu nzira y’umuharuro, Kubg’ abandyamiye.

¹²Ntumpe abarwanizi banje ngo bangirire uko bagomba, Kukw ivyabona vy’ibinyoma binkūriye hasi, n’abafuhagira inzigo.

¹³Mba narihebūye iyo ntizera ko nzobonera ukugira neza kw’Uhoraho Mw isi y’abakiriho.

¹⁴Ni witege Uhoraho: Rema, umutima wawe uhūmure: Nuko, ni witege Uhoraho.