Read Bibliya Yera 1951 Zaburi 29 Bible Online

Zaburi 29 - Bibliya Yera 1951 bible

Zaburi 29

¹Zaburi ya Dawidi. Mwaturire Uhoraho, yemwe bana b’Imana, Mwaturire Uhoraho kw afise icubahiro n’inkomezi.

²Muhe Uhoraho icubahiro kibereye izina ryiwe: Musenge Uhoraho mushajije n’ukwera.

³Ijwi ry’Uhoraho rihindira hejuru y’amazi: Imana y’icubahiro ihindisha inkuba, Ni we Uhoraho ahindishiriza inkuba hejuru y’amazi menshi.

⁴Ijwi ry’Uhoraho rifise inkomezi; Ijwi ry’Uhoraho ryuzuye igitinyiro;

⁵Ijwi ry’Uhoraho risatura ibiti vy’amasederi, Mber’ Uhoraho asatagura amasederi y’i Lebanoni.

⁶Ayakinisha amatavu nk’inyana, I Lebanoni n’i Siriyoni ahakinisha amatavu nk’inyana y’imbogo.

⁷Ijwi ry’Uhoraho rishwaza ibirimi vy’umuriro.

⁸Ijwi ry’Uhoraho rinyiganyiza ubugaragwa, Uhoraho anyiganyiza ubugaragwa bg’i Kadeshi.

⁹Ijwi ry’Uhoraho riramburuza impongokazi, Kandi rigakōkōra ikibira; Kandi mu rusengero rwiwe vyose bikavuga, bit’ Icubahiro kibe icawe.

¹⁰Uhoraho yar’ avyagiye hejuru ya wa Mwuzure: Ni koko, Uhoraho avyagiye ahangamye ibihe bidashira.

¹¹Uhoraho azoha abantu biwe inkomezi, Uhoraho azoha abantu biwe umugisha w’amahoro.