Read Bibliya Yera 1951 Zaburi 34 Bible Online

Zaburi 34 - Bibliya Yera 1951 bible

Zaburi 34

¹Iyi Zaburi n’iya Dawidi, hamwe yisarishiriza imbere ya Abimeleki, na we agaca amwirukana, akagenda. Nzokwama mpimbaza Uhoraho ibihe vyose, Ishimwe ryiwe rizoba mu kanwa kanje urudaca.

²Uhoraho ni we umutima wanje uzokwirata, Abaciye bugufi bazovyumva, banezerwe.

³Ni muhimbazanye nanje Uhoraho, Dushirane hejuru izina ryiwe.

⁴Narondeye Uhoraho, aranyitaba, Ankiza ubgoba nari mfise bgose.

⁵Bamwitegereje, mu maso habo harakemuka, Mu maso habo ntihazokwigera hamāramāra.

⁶Uyu mugorwa yaratakamvye, Uhoraho aramwumva, Amukiza amarushwa yiwe yose.

⁷Umumarayika w’Uhoraho ashagaje impande zose z’ abamwubaha, Akabarokora.

⁸Ni mwumvirizeko, mumenye yuk’ Uhoraho aryoshe: Hahirwa ūmuhungirako.

⁹Ni mwubahe Uhoraho, yemwe abera biwe, Kukw abamwubaha batagira ico bakena.

¹⁰Imigunza y’intambge ishobora kuburanirwa no gusonza, Arikw abarondera Uhoraho ntibazogira iciza bakena.

¹¹Yemwe bana bato, ni muze, munyumve: Ndabigishe kwubaha Uhoraho.

¹²Ni nde agomba ubugingo, Akifuza kuramba, ngw az’ abone ivyiza?

¹³Uz’ ubuze ururimi rwawe, rwoye kuvuga ikibi, N’iminwa yawe yoye kuvuga ivy’ uguhendana.

¹⁴Tandukana n’ibibi, ukore ivyiza, Rondera amahoro, uyakurikire, kugira ng’ uyashikīre.

¹⁵Inyonga z’Uhoraho ziri ku bagororotsi, N’amatwi yiwe ayabangira ugutakamba kwabo.

¹⁶Igitsure c’Uhoraho kiri ku bakora ibibi, Ngw ahenebereze ukwibukwa kwabo mw isi.

¹⁷Abagororotsi baratakamvye, Uhoraho arabumva, Abakiza amagorwa yabo yose.

¹⁸Uhoraho aba hafi y’abafise imitima imenetse, Kand’ akiza abafise imitima ijanjaguritse.

¹⁹Amarushwa y’umugororotsi ni menshi, Arik’ Uhoraho ayamukiza yose.

²⁰Azigama amagufa yiwe yose, Nta na rimwe rivunika.

²¹Ibibi bizokwica umunyakibi, Abanka umugororotsi bazocirwakw iteka.

²²Uhoraho acungura ubugingo bg’abasavyi biwe, Mu bamuhungirako nta n’ umwe azocirwakw iteka.