Read Bibliya Yera 1951 Zaburi 35 Bible Online

Zaburi 35 - Bibliya Yera 1951 bible

Zaburi 35

¹Zaburi ya Dawidi. Uhoraho we, būrana n’abambūranya, Rwana n’abandwanya.

²Fata inkinzo nini na ntoya, Uhaguruke kugira ng’ untabare,

³Kand’ usohore icumu n’ikimito urwanye abampīga. Ubarire umutima wanje, uti Ni jewe gakiza kawe.

⁴ Abarondera ubugingo bganje bamāramāre, batētērwe, Abangīra inama yo kungirira nabi basubizwe inyuma, bicwe n’isoni.

⁵Babe nk’umuguruka utumurwa n’umuyaga, Kand’ umumarayika w’Uhoraho abirukane.

⁶Inzira yabo ibe umwiza n’ ubunyerere, Kand’ umumarayika w’Uhoraho abahīge.

⁷Kuko banteze umutego mu cobo ata nyanduruko, Kandi bimbiye ubugingo bganje ata nyanduruko.

⁸Kugesezwa kubagweko giturumbuka, Kand’ umutego bateze abe ari bo ufata ubgabo: Bawugwemwo, bagesezwe.

⁹Ni ho umutima wanje uzovugiriza impundu Uhoraho, Unezererwe agakiza kiwe.

¹⁰Amagufa yanje yose azovuga, at’ Uhoraho, ni nde ahwanye nawe? Kuk’ ukiza umugorwa abamurusha inkomezi, Ugakiza umugorwa n’umukene ababambura.

¹¹Ivyabona vy’ibinyoma biva hasi, Bakanyagiriza ivyo ntazi, babimbaza.

¹²Nabakoreye ivyiza bansubiza ibibi, Bigahindura umutima wanje nk’imbura.

¹³Ariko jeho, uko bārwara, imyambaro yanje yaba amagunira, Nababarisha ubugingo bganje kwisonzesha, Ngasenga ncuritse umutwe mu gikiriza.

¹⁴Nkamera nk’ah’ ar’ umukunzi wanje canke mwene mama arwaye, Nkicurikīra nk’ūgandaye, nk’ ūririra nyina.

¹⁵Ariko jeho ncumbagiye baranezerwa, bakarundana, Abantu b’imburakimazi banteranirako, sinabimenya. Baranshishimura ntibīgarura.

¹⁶Bandyaniriza insya z’amenyo, Nk’ukw abacokoranyi bavugira ibiteye isoni ah’ abantu bakoraniye mu mazimano.

¹⁷Mwami, uzogeza hehe kubirāba irarirari? Kiza ubugingo bganje ukugeseza kuri muri bo, Ico mfise rudende gikize intambge.

¹⁸Nanje nzogushimira mw ishengero rinini, Nzoguhimbariza mu bantu benshi.

¹⁹Abanyankishwa n’inyanduruko z’ibinyoma boye kunyitamba hejuru, Abanyankira ubusa boye kumvunanira akagohe.

²⁰Kuko batavuga ivy’ amahoro: Ariko baja inama yo kurondera amagambo babeshera abībēreye ngaho mu gihugu.

²¹Mbere banyasamiye cane, Baravuga, bati Ha ha ha ha! Ijisho ryacu rirabibonye!

²²Nawe warabibonye, Uhoraho; ntucereze: Mwami, ntumbe kure.

²³Ikakaze, wikangurire kumpereza ivy’ urubanza rwanje, Urubanza rw’ivyanje, Mana yanje, Mwami wanje.

²⁴Uhoraho, Mana yanje, umpereze urubanza rukwiranye n’ukugororoka kwawe; Ntibanyitambe hejuru.

²⁵Ntibibgire mu mitima yabo, bati Ha ha! Ico ni co twagomba. Ntibavuge, bati Turamuyongobeje.

²⁶Abanezerezwa n’uko ngiriwe nabi bicwe n’isoni, bateteranwe: Abanyiratako bambikwe isoni n’ugukēngērwa.

²⁷Abanezererwa urubanza rwanje ruroranye bavugishwe impundu n’umunezero, Mbere ni bavuge urudaca, bat’ Uhoraho ahimbazwe, Akunda k’umusavyi wiwe aba amahoro.

²⁸Nanje ururimi rwanje ruzovuga ivy’ ukugororoka kwawe, Ruzovuga ishimwe ryawe umusi wīre.