Read Bibliya Yera 1951 Zaburi 37 Bible Online

Zaburi 37 - Bibliya Yera 1951 bible

Zaburi 37

¹Zaburi ya Dawidi. Ntugahagarikwe umutima n’ inkozi z’ibibi, Kandi ntukagirire ishari abakora ivy’ ukugabitanya.

²Kuko bazotemwa vuba nk’ ubgatsi, Bazokwuma nk’ukw imboga zitotahaye zuma.

³Wizigire Uhoraho, ukore ivyiza, Guma mu gihugu, ushishikare ivy’ ukuri.

⁴Uhimbarwe n’Uhoraho, Na we azoguha ivyo umutima wawe ugomba.

⁵Ukorere Uhoraho urugendo rwawe rwose, Abe ari we wishimira, na we azobishitsa.

⁶Kand’ azokwerekana ukugororoka kwawe nk’umuco, N’urubanza rwawe ruroranye nk’igihe co mu mashōka.

⁷Uhwekerere imbere y’Uhoraho, umurorēre wihanganye: Ntuhagarikwe umutima n’ ūguwe neza mu rugendo rwiwe, N’umuntu ashitsa imigabo mibi.

⁸Reka ishavu, va mu burake, Ntuhagarike umutima, kukw ico kizana gukora ibibi gusa;

⁹Kukw inkozi z’ibibi zizorandurwa, Arikw abarorereye Uhoraho bazoragwa igihugu.

¹⁰Kuko hasigaye igihe gito, umunyakibi ntabeho; Mbere, uzokwitegereza ahiwe, umubure.

¹¹Arikw abagwaneza bazoragwa igihugu, Bazonezererwa amahoro y’ umusēsekara.

¹²Umunyakibi aja inama yo kugirira umugororotsi nabi, Kand’ amuryaniriza imisaya.

¹³Umwami Imana azomutwenga, Kukw abona yuk’ umusi wiwe urik’ urashika.

¹⁴Abanyakibi basokōye inkota, bafoye imiheto, Kugira ngo batūre hasi umugorwa n’umukene, Bice abagenda batunganye.

¹⁵Inkota yabo ni bo izocumita mu mitima, Imiheto yabo izovunika.

¹⁶Ibikeya umugororotsi atunze Biruta ibihinda vy’abanyakibi benshi.

¹⁷Kukw amaboko y’abanyakibi azovunika: Arik’ Uhoraho aramira abagororotsi.

¹⁸Uhoraho arazi imisi y’abatācumuye, Umwandu wabo uzokwamah’ ibihe vyose.

¹⁹Ntibazokwicwa n’isoni mu gihe c’ivyago, Mu misi ya kigoyi bazohāzwa.

²⁰Arikw abanyakibi bazohona, Kand’ abansi b’Uhoraho bazoshira nk’ubgiza bg’ivyanya, Bazokamangana, bakamangane nk’umwotsi.

²¹Umunyakibi aragurānwa, ntiyishure: Arik’ umugororotsi agira ubuntu, agatanga.

²²Kukw abahezagirwa n’Uhoraho bazoragwa igihugu; Arikw abavumwa na we bazorandurwa.

²³Iy’ intambuko z’umuntu zishigikiwe n’Uhoraho, Akanezererwa inzira yiwe,

²⁴Naho yotemba, ntazoshika hasi rwose, Kuk’ Uhoraho amuramira mu kuboko kwiwe.

²⁵Uhereye nkiri muto, none ndashāje, Ariko sinigeze kubona umugororotsi yahebge, Cank’ uruvyaro rwiwe rusēgerereza ivyo kurya.

²⁶Agira ubuntu umusi ukīra, akagurāna abandi; Uruvyaro rwiwe rukagira umugisha.

²⁷Tandukana n’ibibi, ukore ivyiza, Ubone kwamaho.

²⁸Uhoraho akunda imanza ziroranye, Ntaheba abakunzi biwe. Bazigamwa ibihe vyose; Arik’ uruvyaro rw’abanyakibi ruzorandurwa.

²⁹Abagororotsi bazoragwa igihugu, Bakibemw’ ibihe bidashira.

³⁰Akanwa k’umugororotsi kavuga ivy’ ubgenge, N’ururimi rwiwe ruvuga ibiroranye.

³¹Ivyagezwe vy’Imana yiwe biri mu mutima wiwe; Nta ntambuko ziwe zizonyerera.

³²Umunyakibi agenzura umugororotsi, Akarondera ingene yomwica.

³³Uhoraho ntazomurekera mu kuboko kwiwe, Kandi ntazomutsindisha mu manza.

³⁴Urorēre Uhoraho, ugumye inzira yiwe, Na we azogushira hejuru ng’ uragwe igihugu: Abanyakibi bazorandurwa ubirorēra.

³⁵Nabonye umunyakibi afise ububasha buhambaye, Agasaye nk’igiti kiremvye kir’ aho cimejeje.

³⁶Maz’ umuntu yarahaciye, asanga ata we, Mbere naramurondeye, ntiyaboneka.

³⁷Witegereze ūtunganye rwose, urābe umugororotsi: Kukw amaherezo y’ūmeze artyo ar’ amahoro.

³⁸Abacumura bo bazohonera hamwe, Iherezo ry’umunyakibi n’ amahonero.

³⁹Arikw agakiza k’abagororotsi kanduruka k’Uhoraho, Ni we buhungiro bgabo mu gihe c’amagorwa.

⁴⁰Kand’ Uhoraho arabatabara, akabarokora, Abarokora mu banyakibi, akabakiza, Kuko bamuhungiyeko.