Read Bibliya Yera 1951 Zaburi 38 Bible Online

Zaburi 38 - Bibliya Yera 1951 bible

Zaburi 38

¹Iyi Zaburi n’iya Dawidi: ni yo yigeneye ngw ibe icibutso. Uhoraho we, ntumpanane uburake, Canke ng’unkubitane ishavu.

²Kukw imyampi yawe inyangāyemwo, Ukuboko kwawe kukannyikiza.

³Nta hazima mu mubiri wanje kubg’ ubushangashirwe bgawe; Nta buruhukiro mu magufa yanje kubg’ ivyaha vyanje.

⁴Kukw ivyo nagabitanije bindengeye, Bimeze nk’umutwaro uremereye umvuna.

⁵Inguma zanje ziranuka kandi ziratikimye, Kubg’ ubupfu bganje.

⁶Ndahetamye, ndicurikiriye rwose: Ngenda ngandaye umusi ukīra.

⁷Kukw ikiyunguyungu canje cuzuye umururumbo, Kandi nta hazima mu mubiri wanje.

⁸Ndadendebukiwe, ndajanjaguritse: Nnihishwa n’umubabaro wo mu mutima wanje.

⁹Mwami, ivyo nifuza vyose bir’ imbere yawe, Umuniho wanje ntuwunyegejwe.

¹⁰Umutima urancamwo, intege zanje ziracika: No kubona kw’amaso yanje na kwo nyene kwamvuyemwo.

¹¹Abakunzi banje n’abagenzi banje bandāba utw’ ininga kubg’ icago cambayeko; Incuti zanje zimpagarara kure.

¹²Kand’ abahama ubugingo bganje bantega imitego; Abandonderera ivyago bavuga ivyo kunyigamba, Biyumvira ivy’ ubugunge umusi ukīra.

¹³Ariko jeho mmeze nk’igipfamatwi, simvyumva; Mmeze nk’ikiragi kidateranura akanwa.

¹⁴Mbere mmeze nk’umuntu atumva, Ata myishurano iri mu kanwa kiwe.

¹⁵Kukw ari wewe nishimiye, ewe Uhoraho: Ni wewe uzonyishurira, Mwami Mana yanje.

¹⁶Kuko navuze, nti Boye kunyitamba hejuru: Iy’ ikirenge canje kinyereye, banyirata hejuru.

¹⁷Kuko ngira ngo ntembe, Kand’ umubabaro wanje ur’ imbere yanje na ntaryo.

¹⁸Kuko nzokwatura ukugabitanya kwanje, Nzogira umubabaro w’icaha canje.

¹⁹Arikw abansi banje banyankira ubusa barakomeye, Abanyankishwa n’inyanduruko z’ibinyoma baragwiriye.

²⁰Abasubiza ibibi abābakoreye ivyiza Na bo bambereye abarwanizi, kuko nōma inyuma y’iciza.

²¹Uhoraho, ntumpebe: Mana yanje, ntumbe kure.

²²Tebuka untabare, Mwami, gakiza kanje.