Read Bibliya Yera 1951 Zaburi 40 Bible Online

Zaburi 40 - Bibliya Yera 1951 bible

Zaburi 40

¹Iyi Zaburi yahawe umukuru w’abaririmvyi. N’iya Dawidi. Narorereye Uhoraho nihanganye; Antegera ugutwi, yumva ugutakamba kwanje.

²Kand’ ankūra mu rwobo rw’ amahonero no mw ishayo y’ivyondo, Ashira ibirenge vyanje ku rutare, ashigikira intambuko zanje.

³Kandi yashize indirimbo nsha mu kanwa kanje, ni yo shimwe ry’Imana yacu: Benshi bazobirāba, batinye, Bizigire Uhoraho.

⁴Hahirwa umuntu ashira ivyizigiro vyiwe k’Uhoraho, Kandi ntahindukirire abībone, cank’ abizimagiriza mu binyoma.

⁵Uhoraho, Mana yanje, ibikorwa bitangaje wakoze ni vyinshi, Bo n’ivyo wiyumvira kutugirira; Nta wogereranywa nawe. Nogomba kubidonda no kubivuga Birenze uko vyoharūrwa.

⁶ Ibimazi n’amashikanwa y’ifu ntivyaguhimbaye; Amatwi yanje urayazibūye: Ibimazi vyoshejwe n’ibimazi vy’ivyaha ntiwabigomvye.

⁷Mperako ndavuga, nt’ Ehe ndaje, Mu muzingo w’igitabo ni ko vyanditswe kuri jewe:

⁸Mpimbawe no gukora ivyo ugomba, Mana yanje; Mber’ ivyagezwe vyawe biri mu mutima wanje.

⁹Namamaje ubutumwa bgiza bg’ukugororoka mw ishengero ryinshi: Sinzobuza iminwa yanje, Uhoraho, urabizi.

¹⁰Sinnyegeza ukugororoka kwawe mu mutima wanje; Mvuga agakiza kawe, n’ingen’ ur’ uwo kwizigirwa: Imbabazi zawe n’ukuri kwawe simbihisha ishengero ryinshi.

¹¹Nawe ntunyime ukugira neza kwawe, ewe Uhoraho: Imbabazi zawe n’ukuri kwawe bize vyame binzigama.

¹²Kukw ivyago vy’isinzi binkikije irya n’ino, Ivyo nagabitanije bimpambije, nkaba ntabasha kubona. Birengeye umushatsi wo ku mutwe wanje; umutima wanje wamvuyemwo.

¹³ Uhoraho we, emera kunkiza: Uhoraho, tebuka untabare.

¹⁴Abashaka kunyica ngo banzimirize Bicwe n’isoni batētērwe: Abanezerezwa n’uko ngiriwe nabi Basubizwe inyuma bakēngērwe.

¹⁵Abambgira bati Ha ha ha ha! Ibimāramāre bibajoreze.

¹⁶Abakurondera bose bakunezererwe bahimbarwe, Abakunda agakiza kawe baze bame bavuga, Bat’ Uhoraho arahambaye!

¹⁷Ariko jeho nd’ umugorwa, nd’ umukene: Yamar’ Uhoraho arambabara. Ni wewe mutabazi wanje n’ umurokozi wanje: Ntutebe Mana yanje.