Read Bibliya Yera 1951 Zaburi 42 Bible Online

Zaburi 42 - Bibliya Yera 1951 bible

Zaburi 42

¹Iyi Zaburi yahawe umukuru w’abaririmvyi: n’iya bene Kora, yo kwigisha. Nk’ukw impongo ihuzagizwa yifuza imigezi, Ni k’umutima wanje uhuzagizwa ukwifuza, Mana.

²Umutima wanje ugirira Imana inyota, Imana nzima: Nzoza ryari ngo nseruke mu nyonga z’Imana?

³Amosozi yanje ni yo yambereye ivyo kurya ku murango no mw ijoro, Bakarenza izuba bambaza, bat’ Imana yawe iri hehe?

⁴Ibi ndavyibuka, umutima ukantunturira mu nda, Ingene najana n’ishengero, mbajana mu ngoro y’Imana, Tugendana ijwi ry’akanyamuneza n’ishimwe, tur’ ikoraniro rigize umusi mukuru.

⁵Mutima wanje, n’iki gitumye wicurikīra? N’iki gitumye umpagararamwo? Ni wishimire Imana, kuko na none nzosubira kuyihimbariza Agakiza kava mu nyonga hayo.

⁶Mana yanje, umutima wanje uricurikiriye: Ni co gituma nkwibuka ndi mu gihugu ca Yorodani, No ku misozi ya Herumoni, no ku musozi Mizari.

⁷Idamba rihamagara irindi damba, kubgo kubomborana kw’amasūmo yawe: Imipfunda yawe yose n’imikuba yawe yose birandengeye.

⁸Uhoraho angerera imbabazi ziwe ku murango, No mw ijoro indirimbo yiwe yamana nanje, Ni yo nsengesha Imana y’ ubugingo bganje.

⁹Nzobaza Imana, igitandara canje, nti N’iki gitumye unyibagira? N’iki gituma ngenda ngandaye kubg’ agahahazo k’ abansi banje?

¹⁰Abansi banje bantuka nk’abanjanjagura amagufa, Bakarenza izuba bambaza, bat’ Imana yawe iri hehe?

¹¹Mutima wanje, n’iki gitumye wicurikīra? N’iki gitumye umpagararamwo? Ni wishimire Imana kuko na none nzosubira kuyihimbaza, Ni yo gakiza ko mu maso hanje, n’Imana yanje.