Read Bibliya Yera 1951 Zaburi 44 Bible Online

Zaburi 44 - Bibliya Yera 1951 bible

Zaburi 44

¹Iyi Zaburi yahawe umukuru w’abaririmvyi. N’iya bene Kora, yo kwigisha. Mana, twariyumviye n’amatwi yacu, ba sogokuruza bacu batubariye Ibikorwa wakoze mu gihe cabo, mu gihe ca kera.

²Wasohoje amahanga ukuboko kwawe, ariko bo urahabagerēra; Wateye amoko amarushwa, uca ugasāza bano.

³Kukw atar’ iyabo nkota yabahaye kwegukira igihugu, Kand’ atar’ ukwabo kuboko kwabakijije: Ariko n’ikiganza cawe c’i buryo n’ukuboko kwawe n’ umuco wo mu nyonga hawe, Kuko wabakunze.

⁴Mana, ni wewe Mwami wanje: Gerera agakiza aba Yakobo.

⁵Ni wewe uzoduha kwirenza abansi bacu: Izina ryawe ni ryo rizoduha gusiribanga abadukūriye hasi.

⁶Kuk’ umuheto wanje atari wo nzokwishimira, Kand’ inkota yanje atari yo izonkiza.

⁷Ariko ni wewe wadukijije abansi bacu, Watētereje abatwanka.

⁸Imana ni yo twirata umusi ukīra, Kandi tuzoshima izina ryawe ibihe bidashira. Sela .

⁹Ariko noneho wadushiburiye kure, waduteye gukēngērwa, Kandi ntugitabarana n’ingabo zacu.

¹⁰Watumye abansi bacu badukimiranya, Abatwanka baratwinyagira.

¹¹Wadutanze nk’intama z’imbāgwa, Wadushwiragirije mu mahanga.

¹²Ugura abantu bawe ubusa, Kand’ ibiguzi vyabo ntiwabironsemw’ inyungu.

¹³Uduhindura ruvumwa ku babanyi bacu, Agatwengo no gucokorwa ku badukikije.

¹⁴Watugize iciro ry’imigani mu mahanga, Abo kuzungurizwa imitwe n’ amoko.

¹⁵Ubugene nkēngeretse bunyama imbere umusi ukīra, Isoni zo mu maso hanje zirantwikiriye,

¹⁶Kubg’ ijwi ry’ūtongana, agatukana, Kubg’ umwansi n’umuhōzi.

¹⁷Ivyo vyose vyadushitseko; ariko ntitwakwibagiye, Kandi ntitwavuye mw isezerano ryawe.

¹⁸Imitima yacu ntiyasubiye inyuma, Intambuko zacu ntizatirimutse ngo zive mu nzira yawe,

¹⁹Nawe ng’utuvunagurire ahantu h’imbgebge, Ukadutwikiriza igitūtu c’urupfu.

²⁰Namba twaribagiye izina ry’ Imana yacu, Canke tukaya amaboko imbere y’iyindi mana,

²¹Mbeg’ Imana ntizobisuzuma? Kukw izi amabanga yo mu mutima.

²²Mbere twirirwa twicwa bakuduhōra, Twagereranijwe n’intama z’ imbāgwa.

²³Ibambure Mwami, n’iki kigusinzirije? Vyukuruka, ntudushiburire kure ibihe bidashira.

²⁴N’iki gituma upfuka mu nyonga hawe, Ukibagira amarushwa yacu no guhahazwa kwacu?

²⁵Kuk’ ubugingo bgacu bgunamitswe bugashika mu mukungugu, Inda yacu yamatanye n’ivu.

²⁶Kūra hasi, udutabare, Uducungure kubg’ imbabazi zawe.