Read Bibliya Yera 1951 Zaburi 48 Bible Online

Zaburi 48 - Bibliya Yera 1951 bible

Zaburi 48

¹Indirimbo: Zaburi ya bene Kora. Uhoraho arahambaye, abereye gushimirwa cane Ku murwa w’Imana yacu, ku musozi wayo wera.

²Umusozi Siyoni, uri mu ruhande rw’i burārūko, Igihagararo cawo ni ciza, ni wo binezaneza vy’isi yose, Ni wo murwa w’Umwami ahambaye.

³Imana yimenyekanishije mu ngoro zo kuri wo kw ar’ igihome kirekire gikīngira abantu.

⁴Kand’ abami barakorakoranye, Bawurenganira icarimwe,

⁵Barawurāba, baca baratangara, Bacika ivutu, bahunga vuba.

⁶Agatengo kabafatirayo, N’uburibge, nk’ibise vy’umugore aramutswe.

⁷Usāvya amāto y’i Tarushishi, Uyasābishije umuyaga uturutse i burasirazuba.

⁸Nk’uko twumvise, ni ko twabibonye Ku murwa w’Uhoraho Nyen’ ingabo, ku murwa w’Imana yacu: Imana izowushimangira ibihe vyose. Sela .

⁹Mana, twiyumviriye imbabazi zawe Turi mu rusengero rwawe.

¹⁰Mana, nk’ukw izina ryawe riri, Ni kw ishimwe ryawe riri, gushitsa ku mpera y’isi; Ukuboko kwawe kw’i buryo kwuzuye ukugororoka.

¹¹Umusozi Siyoni unezerwe, Abakobga ba Yuda bahimbarwe Kubg’ imanza ziroranye zawe.

¹²Mugendagende kuri Siyoni, muwukikuze, Muharūre iminara yaho,

¹³Mwitegereze cane inzitiro zaho z’amabuye, Mwiyumvire ingoro zaho: Kugira ngo muze muvyīgānire ab’ igihe kizoza.

¹⁴Kukw iyi Mana ar’ Imana yacu ibihe bitazoshira, Ni yo izoturōngōra gushitsa ku rupfu.