Read Bibliya Yera 1951 Zaburi 51 Bible Online

Zaburi 51 - Bibliya Yera 1951 bible

Zaburi 51

¹Iyi Zaburi yahawe umukuru w’abaririmvyi. Ni Zaburi ya Dawidi, yanditse hamwe uwavugishwa n’Imana Natani yaza kuri we, Dawidi amaze gusambana na Batisheba. Ngirira ikigongwe Mana, kubg’ imbabazi zawe: Kubg’ isinzi ry’imbabazi zawe usibanganye ibicumuro vyanje.

²Unyuhagire rwose ukugabitanya kwanje, Unyoze icaha canje.

³Kuko nzi ibicumuro vyanje, Icaha canje cama imbere yanje na ntaryo.

⁴Ni wewe, ni wewe ubgawe, nacumuyeko, Nakoze ikibi mu nyonga zawe: Vyabaye birtyo kugira ng’ uboneke k’ugororotse ni wavuga, Kand’ uboneke k’uroranya ni waca urubanza.

⁵Rāba, nabumbanywe ukugabitanya, Mu vyaha ni ho mama yamvyariye.

⁶Rāba, ugomba ukuri hirya mu mutima, Mu bgigobeko bgawo uzommenyesha ubgenge.

⁷Unyezeshe ezobu, ndera: Unyuhagire ndaba derere kurusha uko shelegi[5] yera.

⁸Unyumvishe umunezero n’ uguhimbarwa, Kugira ngw amagufa wavunnye anezerwe.

⁹Hisha inyonga zawe ivyaha vyanje, Usibanganye ibigabitanyo vyanje vyose.

¹⁰Mana, undememw’ umutima utunganye: Unsubizemw’ umutima uhamye.

¹¹Ntunte kure yo mu nyonga zawe, Ntunkūreko Mpwemu wawe Yera.

¹²Unkomōrere umunezero w’ agakiza kawe; Unshigikirishe umutima ushize icīra.

¹³Ni ho nzokwigisha inzira yawe abacumura, Abanyavyaha baguhindukirire.

¹⁴Unkize umwenda w’amaraso y’umuntu, Mana, we Mana y’agakiza kanje; Ni ho ururimi rwanje ruzorenza ijwi ruririmba ukugororoka kwawe.

¹⁵Mwami, teranura iminwa yanje, Ni ho akanwa kanje kazokwamamaza ishimwe ryawe.

¹⁶N’uk’ utanezererwa ibimazi, mba mbigushikaniye: Ntuhimbarwa n’ibimazi vyoshejwe.

¹⁷Ibimazi Imana ishikanirwa n’umutima umenetse; Umutima umenetse, ujanjaguwe, Mana, ntuzowukēngēra.

¹⁸Ugirire neza i Siyoni, nk’uko haguhimbara; Wubake inzitiro z’amabuye z’i Yerusalemu.

¹⁹Ni ho uzonezerwa n’ibimazi bitunganye, ni vyo bimazi vyoshejwe, n’ibimazi vyoshejwe bidasonōye; Ni ho bazoshikanira amamasa ku gicaniro cawe.