Read Bibliya Yera 1951 Zaburi 55 Bible Online

Zaburi 55 - Bibliya Yera 1951 bible

Zaburi 55

¹Iyi Zaburi yahawe umukuru w’abaririmvyi; bavugira inanga. N’indirimbo ya Dawidi yaronkeshejwe ubgenge. Mana, tegera ugutwi ugusenga kwanje; Ntiwihishe ukwinginga kwanje.

²Zirikana unyumve, unyishure: Nembembeshwa n’amajojwa yanje, ndaniha;

³Kubg’ ijwi ry’umwansi, Kubg’ agahahazo k’abanyakibi. Kuko bandundakw amagorwa, Bakampīgana inzigo.

⁴Umutima wanje umbabariza cane imbere, Ubgoba bginshi bg’urupfu bunguyeko.

⁵Gutinya n’ukuja mu gatengo binshitseko, Ngwishijwe igihūmura no gucika ivutu.

⁶Ndavuga, nt’ Icompa nkagira amababa nk’inuma! Mba ngurutse, nkaruhuka.

⁷Rāba, mba nyerereye ngashika kure, Nkarāra mu bugaragwa. Sela .

⁸Mba mpungiye vuba mu buhungiro, Nkikinga igihuhuta n’inkūbi y’umuyaga.

⁹Mwami, ubayongobeze, uyoberanye indimi zabo: Kuko nabonye umuryano n’ intambara mu gisagara;

¹⁰Ku murango no mw ijoro bagendagenda hejuru y’inzitiro z’amabuye zaco; Kandi kugabitanya n’inzigo biri hagati muri co;

¹¹Ibibi biri hagati muri co: Agahahazo n’ubugunge ntibiva mu nzira zaco.

¹²S’umwansi yantutse, Vyari kumbera ibitwarika; Cank’ uwanyanka si we yanyishimye hejuru, Mba naramwinyegeje.

¹³Ariko ni wewe, urunganwe rwanje, Uwo twagendana, umukunzi wanje pfampfe.

¹⁴Twashira hamwe twinovorana, Tukagendagendana n’ishengero mu ngoro y’Imana.

¹⁵Urupfu rubazeko giturumbuka, Bamanuke baje i kuzimu bakibona, Kuko gukora ivyaha kuri mu ngo zabo no mu mitima yabo.

¹⁶Jeho nzokwambaza Imana, Uhoraho azonkiza.

¹⁷Ku mugoroba no mu gitondo no mu mashōka nzokwama niganyira, ncura umuniho, Na we azokwumva ijwi ryanje.

¹⁸Yacunguye ubugingo bganje ngo bube mu mahoro, kugira ngo ntibanyegēre, Kukw abandwanya ari benshi.

¹⁹Imana izonyumva, ibacishe bugufi, Ni yo ihora ihangamye uhereye kera hose. Sela . Izocisha bugufi abatigeze bahīndāna, Batubaha Imana.

²⁰Wa wundi yarāmvuye amaboko ngw arwanye abābana na we amahoro, Yahumanije isezerano ryiwe.

²¹Akanwa kiwe kanyerera nk’ amavuta, Arik’ umutima wiwe warimw’ intambara gusa; Amagambo yiwe yaremba kurusha amavuta ya elayo, Ariko yar’ inkota zisokowe.

²²Ukorere Uhoraho umutwaro wawe, na we azokuramira: Ntazokwigera akundira umugororotsi kunyiganyizwa.

²³Ariko wewe Mana, ba bandi uzobamanukana muri rwa rwobo rw’amahonero; Abicanyi n’ingunge ntibazocagatiza imisi y’ubugingo bgabo; Ariko jeho nzokwama nkwizigira.