Read Bibliya Yera 1951 Zaburi 66 Bible Online

Zaburi 66 - Bibliya Yera 1951 bible

Zaburi 66

¹Iyi ndirimbo, yitwa Zaburi, yahawe umukuru w’abaririmvyi. Yemwe abari mw isi yose, muvugirize Imana impundu:

²Muririmbe mwerekana icubahiro c’izina ryayo, Muhimbaze ishimwe ryayo.

³Mubgire Imana, mut’ Ereg’ ibikorwa vyawe biteye ubgoba! Ubushobozi bgawe bginshi buzotuma abansi bawe bose bakwunamira baguhema.

⁴Abo mw isi yose bazogusenga, Bakuririmbire: Bazoririmbira izina ryawe. Sela .

⁵Ni muze murābe ibikorwa vy’Imana, Iteye ubgoba ku vyo igirira abana b’abantu.

⁶Yahinduye ikiyaga ahūmūtse, Kandi baciye mu ruzi n’ ibirenge: Aho ni ho twayinezererewe.

⁷Iganzisha ubushobozi bgayo ibihe bidashira; Inyonga zayo zitegereza amahanga: Abagarariji ntibishire hejuru. Sela .

⁸Yemwe mwa mahanga, ni muhimbaze Imana yacu, Mwumvikanishe ijwi ry’ishimwe ryayo.

⁹Izigama ubugingo bgacu ntibupfe, Kandi ntikundira ibirenge vyacu ko bitirimuka.

¹⁰Kuko Mana wadukwanguye; Watuvugutiye nk’uko bavugutira ifeza.

¹¹Watuzanye mu mutego, Waduhekesheje umutwaro uremereye mu mugongo.

¹²Wahaye abantu kuduhonyangisha ku gakanu amafarasi bagenderako, Twaciye mu muriro no mu mazi; Maz’ udukūramwo, udushira ahantu hatūritse.

¹³Ndinjirana ibimazi vyoshejwe mu ngoro yawe, Ndagushitsakw amasezerano yanje,

¹⁴Amwe yanteranuriye iminwa, Akanwa kanje kakayavuga, hamwe nari mu mubabaro.

¹⁵Ndagushikanira ibimazi vyoshejwe vy’amatungo avyibushe, N’umubabge w’amapfizi y’ intama; Ndashikana amamasa bo n’ impene. Sela .

¹⁶Yemwe abubaha Imana mwese, ni muze mwumve, Nanje mvuge ivyo yagiriye ubugingo bganje.

¹⁷Nayitakambishirije akanwa kanje, Ururimi rwanje rwarayihimbaje.

¹⁸Iyaba nari nshize umutima wanje ku vyo kugabitanya Umwami Imana ntaba yaranyumviye.

¹⁹Ariko vy’ukuri Imana iranyumviye, Yabangiye ugutwi ijwi ry’ ugusenga kwanje.

²⁰Imana ihimbazwe, Itirukanye ugusenga kwanje, kand’ itānkūyekw imbabazi zayo.