Read Bibliya Yera 1951 Zaburi 69 Bible Online

Zaburi 69 - Bibliya Yera 1951 bible

Zaburi 69

¹Iyi Zaburi yahawe umukuru w’abaririmvyi: bavugira inanga mw ijwi ryitwa Amarebe. N’iya Dawidi. Nkiza Mana: Kukw amazi ashitse no ku bugingo bganje.

²Ndadobeye mw ishayo imira, idafise aho gushinga ikirenge: Nshitse mu mazi amira, ah’ umukuba undengera.

³Kurira kwanje kuranduhije; umuhogo urūmye: Amaso yanje yākobotse nkirorereye Imana yanje.

⁴Abanyankira ubusa baruta umushatsi wo ku mutwe wanje mu bginshi: Abagomba kundandura, banyankishwa n’inyanduruko z’ibinyoma, barahambaye: Ni ho narihishijwe ico ntatwaye.

⁵Mana, ni wewe uzi ubupfu bganje: Ivyaha vyanje ntubinyegejwe.

⁶Mwami, Uhoraho Nyen’ ingabo, abakurorereye ntibaze bamāramāzwe kubganje: Mana y’Abisirayeli, abakurondera ntibaze batēterezwe kubganje.

⁷Kuko nihanganira ibitutsi bakumpōra; Isoni zitwikiriye mu maso hanje.

⁸Mpindutse akavantara ku bo tuvukana, Na murundi kuri bene mama.

⁹Kukw ishaka ry’inzu yawe rindya; Ibitutsi vy’abagutuka vyaguye kuri jewe.

¹⁰Aho narira, ngahanisha umutima wanje kwisonzesha, Vyampindukiye ibitutsi.

¹¹Aho nagize amagunira kuba imyambaro yanje, Nabahindukiye iciro ry’imigani.

¹²Abicara kw irembo baramvuga; Nd’ indirimbo y’ababorewe.

¹³Ariko jeho, amasengesho yanje ari kuri wewe, Uhoraho: Mana, mu gihe co kwemererwamwo, kubg’ isinzi ry’ imbabazi zawe, Unyishurishe ukuri kw’agakiza kawe.

¹⁴Unshayure mw ishayo, sindobere: Nkizwe abanyanka, nkizwe n’amazi maremare.

¹⁵Umukuba ntuntware, Mw idamba ntihammire: Rwa rwobo ntirundumanirizek’ umunwa warwo.

¹⁶Uhoraho unyishure, kukw imbabazi zawe ari nziza: Unkebuke, nk’uko kugira neza kwawe ari kwinshi.

¹⁷Kandi ntuhishe umusavyi wawe mu nyonga hawe; Kuko ngowe: unyishure vuba.

¹⁸Wēgēre ubugingo bganje, ubukize: Uncungure kubg’ abansi banje.

¹⁹Ni wewe uzi ukuntu ntukwa, n’ukuntu ntēterezwa, n’ ukuntu nkēngērwa: Abarwanizi banje bose bar’ imbere yawe.

²⁰Ibitutsi vyammenaguye umutima, ndaremerewe cane: Nareretse ko har’ uwongirira akagongwe, nta wabonetse; N’uko har’ abonyirura, ndabura.

²¹Kandi bāmpaye umururazi kuba ivyo kurya vyanje; Ngize inyota bampa inkarisha ngo ndayinywe.

²² Ameza yabo ahinduke ururiba imbere yabo: Bakiri mu mahoro, ahinduke umutego.

²³Amaso yabo n’ahumwe, ntibabone; Wame uhindisha agashitsi ikiyunguyungu cabo.

²⁴Ubasukek’ ugushangashirwa kwawe, Uburake bgawe bg’inkazi bubahamvye,

²⁵I wabo hasigare imisaka, Kandi ntihakagire ūba mu mahema yabo.

²⁶Kuko bahama uwo wakubise; Kandi bongeranya umubabaro w’abo wakomerekeje.

²⁷Ibigabitanyo vyabo ubibasubirize mu nkōko: Ntibaze binjire mu vy’ukugororoka kwawe.

²⁸Basibanganywe mu gitabo c’ ubugingo, Ntibaze bandikanwe n’abagororotsi.

²⁹Ariko jeho nd’umugorwa, ndababaye; Mana, agakiza kawe kanshire hejuru.

³⁰Nzotazirisha izina ry’Imana indirimbo: Nzoyihimbarisha ishimwe ry’ ivyo yankoreye.

³¹Ivyo bizohimbara Uhoraho kurusha impfizi, Cank’ imasa ifise amahembe n’inzāra.

³²Abaciye bugufi bazobirāba banezerwe; Yemwe abarondera Imana, imitima yanyu isubizwemw’ ubugingo.

³³Kuk’ Uhoraho yumva abakene, Ntakēngēra imbohe ziwe.

³⁴Ijuru n’isi ni bimushime, N’ibiyaga n’ibibigendamwo vyose.

³⁵Kukw Imana izokiza Siyoni, ikubaka ibisagara vya Yuda; Bazohaba, hababere ishamvu.

³⁶Kand’ uruvyaro rw’abasavyi bayo ruzoharagwa; Abakunda izina ryayo bazohagerēra.